شیعه عالیملرین هامیسی او حضرتین کمال، فضل، علم و دؤزومو و آیری کمالاتینا تصریح ائدیب و اونو جدّی رسول‌الله (ص) و علی بن ابی طالب (ع) کیمی بوتون یاخجیلیقلارین جامعی ساییبلار و سونّی بؤیوکلری‌ده او حضرتین فضیلتینه اعتیراف ائدیبلر. دوققوزونجو ایمامین خصوصیّتلریندن بیری، او حضرتین ویلادتی‌نین مودّتلر اوّل شیعه‌لر طرفیندن گؤزلنیلمه‌سی ایدی. ایمام رضا (ع) آتاسی ایمام موسی بن جعفر (ع) و او دا رسول‌الله‌دان نقل ائدیب بویورور: «آتام کنیزلرین لاپ یاخجیسی‌نین اوغلونا فدا اولسون. همان«نوبه» اهلی اولان [کنیز]».
ریوایتلره رغماً، شیعه‌لرین اینتیظاری مودّتلرجه یئرینه یئتیشمه‌ییب نیگرانچیلیغا دؤندو.اونلار ایمام رضانین(ع) 45 یاشی ردّ اولدوغونو و او حضرتین اوغلو اولمادیغینی گؤروردولر. اونلار داها چوخ عباسی ظولم دستگاهی‌نین او حضرته حمله ائدیب شهید ائتمه‌سیندن قورخوردولار. واقفیه باشچیلاری طرفیندن یاییلان شاییعه‌لر بو نیگرانچیلیقلاری چوخالدیردی. اونلار بئله شاییعه سالیردیلار: ایمام کاظم (ع) دیریدیر و غیبته گئدیب و ایمام رضا (ع) سونسوزدور.
نهایتده هیجری قمری ایلین 195-جی ایلینده رجبین اونوندا گؤزله‌نیلن مولود دونیایا گلدی.تاریخچیلیر او حضرتین ویلادتی ایلی باره‌ده ایجماعلاری وار و فقط آی و گونونده ایختیلاف وار.
«خیزران»ین حامیله اولدوغو بللی اولاندان سونرا ایمام موسی بن جعفرین (ع) قیزی، قارداشی ایمام رضایا (ع) نامه یازیب اونو خبردار ائله‌دی.ویلادتدن سونرا حضرت او گئجه‌نی سحره‌جن بالاسی‌نین بئشیگی یانیندا اولوب اوننان نجوا ائلیردی و ایلاهی علملری اونا اؤرگدیردی. ایمام رضا (ع) همن گئجه اؤز بالاسی‌نین ویلادتینی شیعه‌لره خبر وئردی.
شیعه‌لرین سککیزینجی ایمامی، اوغلونون آدینی رسول‌الله‌ین آدینا «محمد» قویدو. او حضرتین کونیه‌سی «ابو جعفر» ایدی و چونکی بئشینجی ایمامین‌دا کونیه‌سی ابوجعفری ایدی تاریخچیلر او حضرتی ایکینجی ابوجعفر آدلاندیریرلار. او حضرتین آیری غیر مشهور کونیه‌سی‌ده «ابو علی»دیر. تاریخ و حدیث کیتابلاریندا او حضرته چوخلو لقبلر ساییبلار، اونلارین مشهورلاری بونلاردیر: "تقی"، "جواد"،"مرضی"، " متوکل"،" متقی"، " زکی"،"متجب"، "مرتضی"، "قانع"، "عالم ربانی"،"رضی"، "مختار"، "صادق"، "صابر" و"فاضل". هابئله سونّیلر ایچینده «باب‌المراد» لقبینه‌ده مشهوردور. آما او حضزتین لاپ مشهور لقبلری "تقی" و "جواد"دیر.
ایمام جواد(ع) 202-جی هیجری ایلینده یئددی یاشیندا ایمامته چاتدی. ایمام جوادین (ع) عؤمرونون بؤیوک قیسمی عباسی خلیفه‌سی مأمونون دؤرونده کئچدی. خلیفه دونیا مالی و مقامینان او حضرتین موقدسلیغینی آشاغی یئندیرماغا چالیشیردی.
اونون بیرینجی ایشی بو اولدو کی قیزینی او حضرتین عقدینه گتیرسین و توی مراسیمینی ایسرافلی و تؤک-داغیتلی ائله‌ماغینان او حضرتی‌ده بو ایشلرده سهیم گؤرستسین. آما ایمام (ع) اؤز عفیف‌یانا رفتارینن اونون بو ایشینی ناکام قویدو.
مأمون اؤز برنامه‌لرینی ناکام گؤرنده او حضرتین قتلینه بئل باغلیر و بیر گئجه کئفلی حالدا اونا حمله ائدیر آما مؤعجیزه‌یه بنزر شکیلده ایمام نجات تاپیر.
مأموندان سونراکی خلیفه معتصم‌ده خیلافته چاتاندا، ایمامی بغدادا چاغیریب درباردا گؤز آلتیندا ساخلادی. سارایداکی موباحیثه‌لرده او حضرت، سارایین عالیملرینی مغلوب ائله‌دیغیناگؤره قاضی‌القضات خلیفه یانیندا او حضرتدن سعایت ائله‌دی و خلیفه‌نی اونو شهید ائتمگه راضی سالدی.
معتصم بو دفعه قیزینی او حضرتین اؤلدورمه‌سینه مأمور ائله‌دی. معتصمین قیزی «ام فضل» آتاسیندان آلان زهری اوزومه قاتیب اوننان ایمام جوادی (ع) مسموم ائله‌دی.
ایمام جواد(ع) 220-جی هیجری قمری ایلین ذیقعده‌نین آخیرینده 25 ایل برکتلی عؤمردن سونرا شهادته چاتدی و پاک جسدی کرامتلی جدّی موسی بن جعفرین (ع) مزاری کناریندا بغدادین قریش قبریستانلیغیندا تورپاغا تاپیشیریلدی. بو ایکی کرامتلی‌نین ملکوتی مزارلاری کاظمین آدینا مشهوردور و شیعه‌لرین آمال کعبه‌سیدیر.