شیعه‌لرین بیرینجی ایمامی حضرت علی (ع) اؤز کرامتلی همسری حضرت فاطمه (س) باره‌ده بویوروب: من فاطمه و آتاسینا موباهات ائلیرم و سونرا فاطمه‌نی منیم همسرلیغیما وئرنده آللاهین رسولونا ایفتیخار ائلیرم.
موختلیف اینسانلار فرقلی زاویه‌لردن ام‌الائمه‌نین موقدس وجودی باره‌ده صؤحبتلر ائدیبلر آما او حضرتین یوخاری مقامینی بیلماق اوچون کرامتکلی اری حضرت علی‌نین (ع) او حضرتین تعریف و توصیفینده بویوردوغو سؤزلردیلر. چونکی بیر خانیمین اری هامیدان حتّا آتا آناسیندان آرتیق همسرینی تانییار و اونون اخلاقینا تانیش اولار. بونا اساساً حضرت علی (ع)همسری فاطمه‌نی (س) هامیدان یاخجی تانییر و اونون تعریف و توصیفینی آیریلاریندان داها یاخشی دئیه بیلر.
امیرالمؤمنین موشترک زیندگانلیغی‌نین باشلانیشیندا حضرت پیغمبرین: «همسرینی نئجه گؤردون؟» سوآلی‌نین جوابیندا بویورور حضرت زهرا (ع) لاپ یاخشی همسر کیمیدیر کی اونون کؤمگی ایله آللاهی ایطاعت ائله‌ماق اولار. هابئله امیرالمؤمنین همیشه موشترک یاشاییشیندا اؤز سونسوز علاقه‌سینی حضرت زهرایا (س) دیله گتیریردی و اوندان خبرسیز هئچ ایش گؤرموردو و اونونلا مشورت ائله‌ماقدان سئوینیردی حتّا حضرت علی(ع) بعضاً اؤز سؤزلرینی آیریلارینا ثبوت ائتمک اوچون حضرت زهرانین (س) سؤزلرینه ایستیناد ائلیردی.
هابئله حضرت علی (ع) هئچ واخت ائوین چتین ایشلرین پیغمبرین قیزینا تاپیشیرمازدی و موقابیلده حضرت زهرا دا(س) بوغدانی دارتماق و چؤرک پیشیرمک کیمی ائوین چتین ایشلرین گؤروردو و هئچ واخت امیرالمؤمنیندن تقاضا و طلبی اولمازدی و هئچ واخت حضرت علی‌دن (ع) بیر شئی ایسته‌مه‌دی ایستر حضرت علی او ایشی گؤره بیله‌یدی ایستر یوخ.
حضرت علی‌نین(ع) محبّتی حضرت فاطمه‌یه (س) او قدر شیدّتلی ایدی کی حضرت زهرانین (س) عؤمرونون آخیر لحظه‌لرینده‌ده او حضرتین آللاهدان اولان خوفونو و تقواسینی سیتاییش ائلیردی.
حضرت زهرا (س) عؤمرونون آخیر لحظه‌لرینده امیرالمؤمنینه بویورانداکی: «عمی اوغلو حیات بویو سنه یالان دئمه‌میشم، خیانت ائله‌مه‌میشم و هئچ واخت سنینله موخالیفت ائله‌مه‌میشم». حضرت علی (ع) جواب بویوردولار: «ائی پیغمبرین قیزی ! معاذالله کی سن بیر خیلاف ایش گؤره‌سن. سنین تقوا و آللاهی تانیماق و آللاهدان قورخماق روتبه‌ن او قدر یوخاریدیر کی منله موخالیفت ائله‌مه‌سن. سندن آیریلماق منه چتیندیر آما بو ایشه چاره یوخدور».