ایمام حسن (ع) اوِّلده اؤزونو
معاویه‌اینن جنگه حاضیرلادی, آما کؤمکلری‌نین ثابیت‌قدم اولمادیغی و ایسلام دینینه
دَیَن ضربه‌یه گؤره مجبور قالدی معاویه‌اینن صولح ائلیه.
ایمام حسن (ع) و معاویه‌نین
صولحنامه‌سی
بیرینجی مادّه: حسن بن علی حکومت و
خیلافتی معاویه‌یه وئریر, بو شرطله کی معاویه قورآن دستوری و پیغمبرین سیره‌سی‌نه
موطابیق حکومت ائلیه.
ایکینجی مادّه: معاویه‌دن سونرا خیلافت
حسن بن علی‌یه چاتاجاق و اونا بیر ایتّیفاق دوشسه حسین بن علی موسلمانلارین
حکومتینی الینه آلاجاق. هابئله معاویه‌نین حقی یوخدور اؤزونه جانشین موعیّن
ائلیه.
اوچونجو ماده: ناماز واختی
امیرمؤمنان علی‌یه(ع) لعنت اوخوماق و اهانت ائله‌ماق دایاندیرمالیدیر و بوندان
سونرا علی‌دن (ع) فقط یاخجی‌لیغینان یاد اولمالیدیر.
دؤردونجو مادّه: کوفه بیت‌المالیندا
اولان 5 میلیون دیرهم, معاویه‌یه تحویل وئریلمیه‌جاق و گرک حسن بن علی‌نین (ع) نظری
آلتیندا خرجله‌نه. هابئله معاویه اموال باغیشلاماقدا بنی هاشیمی بنی امیه‌دن اوستون
توتمالیدیر. هابئله معاویه گرک «دارابگرد» خراجیندان بیر میلیون دیرهم جمل و صفین
جنگینده حضرت علی‌نین(ع) ریکابیندا ساواشیب شهید اولانلارین خانیواده‌لری آراسیندا
تقسیم ائلیه.
بئشینجی ماده: معاویه تعهود وئریر
کی جماعتین هامیسی, شاملی, حیجازلی, عراقلی و آیری میلّتلرین هامیسی تعقیب و اذیتدن
آماندا اولسونلار و اونلارین کئچمیشده‌کی سابیقه‌لرینه گؤز یومولسون. و اونلارین
هئچ بیری کئچمیشده معاویه حکوتی علئیهینه ائتدیکلری فعالیتلره گؤره تعقیب
اولماسینلار و مخصوصاً عراق اهلی کئچمیشده اولان کینه‌یه گؤره اذیّت
اولماسین.
اوندان علاوه معاویه, علی‌نین (ع)
کؤمکلرینه, هر یئرده اولسالار آمان وئرسین و اونلاری اصلاً اذیت ائله‌مه‌سین. هر
کسین حقّینی اؤزونه وئرسین و علی شیعه‌لری‌نین الینده, بیت المالدان اولان اموال
اونلاردان آلینماسین.
هابئله حسن بن علی و قارداشی حسین
بن علی و پیغمبر خانیندانیندان هئچ کسه, معاویه طرفیندن هئچ جور خطر اولمامالیدیر و
هئچ یئرده اونلار اوچون قورخو فضاسی یارادیلمامالیدیر.
صولحون آخیرینده معاویه تأکیدله
تعهود وئردی کی صولحنامه‌نین بوتون مادّه‌لرینی دقیقاً ایجرا ائلیه‌جاق. او بو
مسأله‌یه آللاهی شاهید گتیردی و شامین بؤیوکلری‌ده شاهید اولدولار.
بئله‌لیغینان ایسلام پیغمبری‌نین(ص)
حسن بن علی هله اوشاق اولاندا دئدیغی فرماییش موحقق اولدو. پیغمبر بیر گون منبره‌ده
اونو گؤرنده بویوردولار: «منیم بو بالام موسلمانلارین آغاسیدیر و آللاه اونون
الی‌اینن موسلمانلارین ایکی دسته آراسیندا صولح یاراداجاق.»