رحلت ختم رسل

ییخیلیب دینین ائوی رحلت ائدیب ختم رسل

چیرپیلیب دین قاپیسی حضرت زهرا باشینا.

سقط اولوب محسنو، زهرا اؤزو ده اولدو شهید

کۆل الندی او زاماندان بری دونیا باشینا.

کربلا فاجعه‎سی بذرین اکیب باشلاندی

تا قیامت نه قوپا زینب کبری باشینا.

مدعی اولمادی فرمان غدیره تسلیم

گؤر نه طوفان گتیریب امت طه باشینا.

مشورت امر الهی‏ده اولور مو؟ هیهات!

چکدیلر جبر ایله مولانی دا شورا باشینا.

حضرت فاطمه‌نین قبری ده مهجور اولدو

چادر عصمتینی سالدی ثریّا باشینا.

امّت اولمازسا امامت ده اولار خانه‎نشین

دولانار کعبه ده گئتدیکجه کیلیسا باشینا.

بو اولان ایشدی کی آخشام چاغی، آللاه چوبانی

چؤلده، آللاه داوارین بوشلایا بیجا باشینا؟

امّتین اکثری مصداق «لقد حق القول»

او حواری ییغیشاممازدی مسیحا باشینا.

مسلمین دؤرد نفری مؤمن اولوب سلمان تک

یوسفین عشقی دۆشر دیبده زلیخا باشینا.

کؤلگه‎سی تاج سعادت، بو شهادت شوقی

اؤزو بیر قوش کی قونوب سدره و طوبی باشینا.

شهریار، گلدی حسینین سسی، عاشوراسی

تا دۆشه عشق شهادت دل شیدا باشینا.