آللاه تعالا نساء سوره‌سی‌نین
117-دن 121-جی آیه‌لرینده بویورور: [موشریکلر] اونون یئرینه, دیشی بوتلری [دوعا
ایله] چاغیریرلار و عوصیانکار شیطاندان سووای, هئچ کسی چاغیرمیرلار
(117) آللاه اونا لعنت ائله‌سین [اوندا کی] دئدی: شکسیز بنده‌لرینین ایچیندن موعیّن
حیصّه [اؤزوم اوچون] گؤتوره‌جگم. (118) و اونلاری یولدان آزدیراجاغام و اوزون
آرزولارا موبتلا ائده‌جاغام و اونلاری مجبور ائده‌جاغام حیوانلارین قولاقلارین
پارچالاسینلار و اونلاری مجبور ائله‌رم تا آللاهین یاراتدیغین تپ‌چئویر ائده‌لر
[آما] هر کس آللاه یئرینه شیطانی [اؤزونه] دوست توتا, قطعاً آشکار ضرره دوشوب.
(119) [بلی] شیطان اونلارا وعده وئرر و اونلاری آرزولارا آتار, و توغلاماقدان
سووای, اونلارا آیری وعده وئرمز (120) اونلارین یئری جهنّمدیر و اوندان قاچا
بیلمزلر. (121)
غافیل اینسانلارین جهنمّه
دوشمکلری‌نین بیر سببی‌ده شیطان دالیسی‌جن گئتماقدیر. اولا بیلر بیری سوروشا کی مگر
شیطان دالیسی‌جن گئدن‌ده وار؟ و یا بو کی مگر اولا بیلر اینسان شیطان دالیسی‌جن
گئده؟ بئله موریدلر اولسا, نئجه‌دیلر؛ یعنی نئجه ایمکانی وار کی اینسان شیطان
دالیسی‌جن گئده و شیطان مورودلری‌نین خصوصیتلری نئجه‌دیر و . . .
گر چی ایندی دونیادا شیطان
پرست و ... گروهلار یارانیب, آما شیطان مورودو اولماق, همان آللاهین سؤزونه
باخماماقدیر.
مریم سوره‌سی‌نین آیه‌لرینده‌ده حضرت
ابراهیمین دیلی‌اینن آتاسینا (و یا عمیسینه) بئله یازیر: ائی آتا ! شیطانی
(وحدانیتدن اوزاقلاشماغینان و بوت‌پرستلیغینان) عیبادت ائله‌مه, چونکی شیطان آللاه
قاباغیندا عوصیان ائدیب. ائی آتا ! من بوندان قورخورام کی آللاه تعالا طرفیندن سنه
عذاب گله, نتیجه‌ده شیطانین دوستلاریندان اولاسان.
قورآن کریمین آیری
آیه‌لرینده‌ده, آللاه تعالا اینسانلارا هوشدار وئریر کی آللاهین امریندن کنار
اولماغینان, شیطان بنده‌لیغی‌نین تورونا دوشمه‌سینلر.
نور سوره‌سی‌نین 21-جی
آیه‌سی, نمل سوره‌سی‌نین 24-جو آیه‌سی, عنکبوت سوره‌سی‌نین 38-جی آیه‌سی, سبا
سوره‌سی‌نین 20-جی آیه‌سی, یاسین سوره‌سی‌نین 60-جی آیه‌سی, زخرف سوره‌سی‌نین 37-جی
آیه‌سی, حج سوره‌سی‌نین 3-جو آیه‌سی, محمد(ص) سوره‌سی‌نین 25-جی آیه‌سی, حشر
سوره‌سی‌نین 17-جی آیه‌سی, بقره سوره‌سی‌نین 14-جو آیه‌سی, اسراء سوره‌سی‌نین 17 و
61 دن 65-جی آیه‌لری, کهف سوره‌سی‌نین 50 و 51-جی آیه‌لری, بو مطلبه ایشاره
ائدیبلر.
شیرک کلمه‌سی موختلیف
صورتلرده حدوداً 168 دفعه قورآندا گلیب. ایطاعت و بنده‌لیغین معناسی چوخ گئنیشدیر.
حتی بیری‌نین سؤزونه, اونو یئرینه گتیرماق نیّتی‌اینن قولاق آسیلسا, (یعنی بو کی
اینسان واخت قویا, دیقّت ائلیه, ساکیت اولا و . . .) بنده‌لیق
حئسابلانار.