دونیا موسلمانلاری‌نین ولی امری بیر ایستیفتادا اؤز نظرینی اس ام اس موسابیقه‌لری باره‌ده اعلام بویوردولار.

اس ام اس موسابیقه‌لری سون ایللرده چوخ راییج اولوب. گاهدان بو موسابیقه‌لرده نظره گلیر کی شانس حئساب اولور. میثال اوچون بیر سئچه‌نک اینتیخاب اولور و شخصین صیرفاً او موسابیقه‌ده شیرکت ائله‌ماغینا گؤره قورعه چکیلیر و برنده‌لره جایزه وئریلیر. یا بعضی موسابیقه‌لرده شخص بیر پارا سوآللارا جواب وئریر و موسابیقه‌ده موشاریکتی اولور.

بیر عیدّه‌یه بو شوبهه یارانیر کی بوجور موسابیقه‌لرده شیرکت ائله‌ماق شرعاً نه حؤکمو وار؟ بو جور موسابیقه‌لرده شیرکت ائتمک و جایزه آلماغین شرعی حؤکمو باره‌ده, دونیا موسلمانلارین ولی امری‌نین نظری آشاغیدا گلیر.

سوآل: اس ام اس موسابیقه‌لرینده شیرکت ائله‌ماق و جایزه آلماغین شرعی لحاظدان نه حؤکمو وار؟

جواب: اگر موسابیقه‌ده شیرکت ائدنلردن اس ام اس‌لرین معمول هزینه‌سیندن آرتیق کسر اولونمایا و جایزه‌نین هزینه‌سی ییغیلان پوللاردان وئریلمه‌یه, ایشکالی یوخدور. آما اگر اس ام اس‌لرین معمول هزینه‌سیندن آرتیق کسر اولا و جایزه‌نی‌ده بو پوللاردان وئره‌لر, حرامدیر.