ایمام حسینین(ع) ویلادت خبری میلادلاریندان قاباق جبرئیل طرفیندن پیغمبره (ص)
وئریلمیشدی و پیغمبر (ص) بو خیرلی و برکتلی اوشاغین دوغوم خبرینی فاطمه زهرایا (س)
وئردیلر.
مشهور نظره گؤره او حضرتین ویلادتی شعبانین اوچودور
ایمام حسین (ع) دؤردونجو هیجری ایلین شعبان آیین اوچونده دونیایا گلدی. بیر
آیری نقله گؤره او حضرت دؤردونجو هیجری ایلینده سه شنبه یا پنجشنبه گونو شعبانین
بئشینده دونیایا گلیب و آیری ریوایته گؤره او حضرت اوچونجو هیجری ایلین شعبانین
اوچونده دونیایا گلیب. علامه مجلیسی بو ریوایتلری نقل ائدندن سونرا اعتیقادی وار
کی اونلارین لاپ مشهوری اودور کی او حضرت شعبانین اوچونده دونیایا گلیب. ایمام
حسینه(ع) مربوط اولان ریوایتلر سونّی‌لرین منبعلرینده چوخدور و ایمام حسین(ع) حدیث
و ریوایت باخیمیندان یوخاری مقامدادیر و شاید بیرینجی دفعه اوچون سونّی‌لر بو
ریوایتی نقل ائدیبلر کی آللاهین رسولی(ص) بویوردولار: منیم خلیفه‌لریم 12 نفر قریش
اهلیندن‌دیلر.
شیعه منبعلرینده خاص‌راق
بیان اولوب کی بو خلیفه‌لر بنی‌هاشم‌دن دیلر و جابر بن عبدالله انصاری‌‌‌نین
ریوایتینده اون‌ایکی ایمامین آدی بللی اولوب.
ایمام حسینین ویلادت خبری جبرئیل طرفیندن پیغمبره (ص) وئریلمیشدی/ام‌فضلین
یوخوسو نه‌ایدی؟
ایمام حسینین ویلادت خبری میلادلاریندان قاباق جبرئیل طرفیندن پیغمبره (ص)
وئریلمیشدی. بو خبر پیغمبره چاتاندا پیغمبر (ص) بو خیرلی و برکتلی اوشاغین دوغوم
خبرینی فاطمه زهرایا (س) وئردیلر و اونلاردا بو خبردن سئویندیلر.
بعضی‌لری یوخولار گؤروب پیغمبره(ص) نقل ائله‌میشدیلر, او جومله‌دن:
پیغمبرین(ص) عمیسی آروادی امّ‌فضل یوخودا گؤردو کی پیغمبرین(ص) بدنیندن بیر تیکه
امّ‌فضلین ائوینه دوشوب. امّ‌فضل پیغمبرین (ص) محضرینه چاتاندا اونون تعبیرین
سوروشدو. پیغمبر (ص) بویوردو: تعبیری بودور کی بیزده بیر اوشاق اولاجاق و سوت
ایچمک اوچون آز مودّت سیزین ائوه گله‌جک.
«حسین» هارونون اوغلو «شبیر» اینن بیر آددا/ پیغمبر (ص) آللاه دستوری‌اینن
«حسین» آدین اینتیخاب ائله‌دی.
ایمام حسن(ع) و ایمام حسینین(ع) آدلاری هارونون اوغلانلاری یعنی شُبَر و
شبیر آدیندا قویولوب. یعنی ایمام حسنی(ع) شبر و ایمام حسینی(ع) شبیر آدیندا آد
قویدولار. البته بو آدلار عبری‌ایدیلر و پیغمبر عرب اولدوغو اوچون بو آدلاری
دگیشیب اونلارین عربی دیلینده معناسی یعنی حسن و حسین قویدولار. بعضی تاریخچیلرین
دئدیگینه گؤره او اطرافین جماعتی حسن و حسین آدلاریله تانیش دئییلدیلر و بو ایکی
آد آللاه طرفیندن پیغمبره نازیل اولدو.