رجبین 25 موصادیفدی 1391 خوردادین ایرمی
یئددیسی ایمام موسی کاظم (ع) شهادت گونودور.
بوزورگوار ایمام کی حضرت ایمام صادقین(ع) بالاسی و ایکی
بوزورگوار بالاسی یعنی حضرت ایمام علی بن موسی, ایمام رضا(ع) و حضرت فاطمه
معصومه(س) اؤلکه‌میزده بیزیم قوناغیمیز و حقیقتده ائو صاحیبیمیزدیلر . .
.اینشاءالله کی اونلار اوچون یاخجی قوناق و یاخجی ائو صاحیبی اولاروق.
حضرت ایمام موسی کاظم(ع) بوزورگوار
آتالاریندان سونرا ظولمله موباریزه‌ده اؤز اجدادی‌نین یولون ایدامه وئردی و
اونلارین علمی و عملی سیره‌لرین ایدامه وئریب و جعفری فیقهین ترویج وئره‌نی
اولدولار.
او حضرتین آدی «موسی», آتاسی ایمام
صادق (ع) و آناسی حمیده‌ایدی و او حضرتین لقبلری عبدصالح، کاظم، باب الحوائج، صابر
و امین ایدی.
او حضرتین دوغوم یئر و زامانی یکشنبه
گون سحر واختی, 128 هیجری قمری ایلین صفر آیی‌نین 7 «ابواء» آدیندا کندده (مکه و
مدینه آراسیندا بیر کند) اولموشدور. او حضرت شهادتی 55 یاشیندا 183ه.ق. رجب آیی‌نین
25 بغداددا هارونون زیندانیندا هارونون دستوری ایله مسموم اولماق اثرینده اولدو.
شریف مرقدلری کاظمین شهرینده (بغداد یاخینلیغیندا) یئرله‌شیر.
ایمام موسی کاظمین(ع) یاشاییشین ایکی
یئره بؤلمک اولار: ایمامتدن قاباق, 128 دن 148 هیجری قمری ایلینه‌جن (20 ایل) و
ایمامت زامانی, 148 دن 183 هیجری قمری ایلینه‌جن(35 ایل)
اونلارینان بیر عصرده اولان خلیفه‌لر
منصور دوانیقی، مهدی عباسی، هادی عباسی و هارون الرشید ایدیلر و او حضرتین ایمامت
زامانی‌نین چوخ بؤلومو (15 ایلی)عباسیلرین بئشینجی خلیفه‌سی هارونون خلافیتینده
اولدو کی او حضرت بو ایللرده نئچه ایل زیندانلاردا قالدی. 10 ایل منصور عباسی
زامانیندا, 10 مهدی عباسی خلافتینده و بیر ایل‌ده هادی عباسی دؤرونده اولدو.
ایمام موسی کاظم(ع) لوح حدیثینده
آللاه تعالا لوح حدیثینده, کی جبرئیل
اونو حضرت زهرایه(س) گتیردی ایمام موسی کاظمین(ع) باره‌سینده دئییر: «موسی, منیم
بنده‌م و منیم دوستوم و منیم سئچدیگیمدیر.»
ایمام کاظم (ع)
او حضرت هئچ‌واخت طاغوتلارا باش اگمه‌ییب
تسلیم اولمادی بلکه اونلارین قاباغیندا دایاندی و اونلارین قاباغیندا پیس ایشلری‌نین
محکوم ائله‌ماغیندا و مونکرلردن نهی ائله‌ماغیندا او قدر توتولاردی کی اونا «کاظم»
دئییردیلر, چونکی اونون آدلاری موسی ایدی و ظالیملر قاباغیندا قیافه‌لی و قاش
قاباقلی اولدوقلاری اوچون اونا «کاظم» دئییردیلر و بو لقب نیشان وئریر کی او حضرت
اؤز عصری‌نین ظالیملریندن ناراضی‌ایدی.
علمیه حوزه‌سی و ایمام کاظمین (ع)
شاگیردلری
او حضرت آتاسی‌نین بؤیوک شاگیردلرین
اؤز دؤره‌سینه ییغدی و اونلارا مخصوص عینایت ائله‌ماغینان جعفری دانیشگاهین
ساخلاماسیندا چوخلی تلاش ائله‌دی و سونّی‌لرین بؤیوک عالیملری و خلیفه‌لرینن
موناظیره ائدیب هامیسینا اثر قویدو. او حضرتین کؤمکلری او جومله‌دن بهلول بن عمرو،
صفوان، یونس‌بن عبدالرحمان، محمدبن ابی عمیر ایدی کی هر بیری شیعه‌لیغین ستونلاری
ساییلیردیلار. سیاسی جهتدن چتین شراییطده اولماقلارینا رغماً اؤز یوخاری هیمّتلری‌اینن
جعفری دانیشگاهین ساخلادیلار.