حضرت زینبین (س) مزاری باره‌ده اوچ نظر
حضرت زینبین(س) مزاری باره‌ده اوچ نظر
«مدینه»، «قاهره» و «دمشق» وار, آما بو اوچ قولون هانسی‌سی بنی هاشم عقیله‌سی‌نین
مزاری باره‌ده دوزدور؟
فارسین خبرنیگاری‌نین گوزاریشینه
گؤره, حضرت زینب کبری سلام الله علیهانین یئری باره‌ده موختلیف ریوایتلر و
نظرلر دئییرلر کی هر گروه بعضی دلیل‌لرینن اؤز ایدّعالارینی ثابیت ائدیرلر.
بعضیلری او حضرتین قبرین دمشقده, بیر عیدّه قاهره‌ده و آیریلاری مدینه‌ده
بیلیرلر. چالیشدیق بو نظریه‌لرین دوز و یا سهو اولماسینی آراشدیراق.
قاهره
بعضی نظرلرده اوخوروق کی حضرت زینب(س)
بنی امیه دستگاهی علئیهینه ائتدیگی آچیقلامالارا گؤره, مجبور قالدی مدینه‌دن مصره
گئتسین. اوردا ساکین اولوب و نهایتاً اوردا دونیاسین دگیشیب. ایندی قاهره ده «سیده
زینب» موجلل و عظمتلی زیارتگاهدیر. (حضرت فاطمه(س) و قیزی‌نین یاشاییشی. هاشم
رسولی محلاتی)
نسابه عبیدلى «اخبار الزینبات»
کیتابیندا ائله ریوایتلر نقل ائلیر کی اونلارین مضمونونا گؤره, گرک حضرت زینب (س)
مصرده قویلانمیش اولا. آما بیز بو ریوایتلره سند و مؤحتوا باخیمدان اعتماد ائلیه‌بیلمیریک,
نییه کی«مرقد العقیله زینب (س)» کیتابی‌نین یازانی محمد حسنین سابقى بو حدیثلره
ایشکال وارید ائله‌ییب و دئییر کی بو راویلارین چوخو کی عبیدلی بو ریوایتلری
اونلاردان نقل ائدیب, مجهولدولار و ریجال و تراجوم و نسب کیتابلاریندا اونلاردان
بیر اثر یوخدور. بو بیر حالدادیر کی بو ریوایتلرین اؤزلری‌ده ایشکالسیز دئییل‌لر.
بعضیلری دئییرلر: قاهره‌ده قویلانان
زینب, زینب بنت یحیى المتوج بن الحسن الانور بن زید بن حسن بن على بن ابیطالب‌دیر,
آما اوردان کی اینسان نئچه نفرین آراسیندا موشترک بیر آدی ائشیدنده اونلارین لاب
مشهورو ذهنه گلر, جماعتین چوخو بئله بیلیبلر کی بو همان مشهور زینب یعنی على بن
ابیطالبین (ع) قیزیدیر. حال بو کی بو گومان اساس‌سیزدیر. البته اشخاصی اؤز بؤیوک
جدّلرینه نیسبت وئرماق معمولدور, نئجه کی بیزیم ایماملاریمیزا پیغمبرین اؤولادی
دئییلر. بونا گؤره زینب بنت یحیى‌نی, زینب بنت على علیهما السلام
اوخوسالار, هئچ ایشکالی یوخدور.
مدینه
بعضی ریوایتلرده گلیب کی حضرت زینب(س)
مدینه‌یه گلیب و ایل یاریم بویو آغلاماق و عزادارلیغا مشغول اولوب و نهایتده همان
شهرده وفات ائدیب و قویلانیب و ایندی او مؤحترم خانیمین قبریندن اثر قالماییب. بو
نظری علامه سید محسن امین دئییر و آیری نظرلردن اعتیبارلیدیر.
گرچی حضرت زینبین (س) مدینه (بقیع)ده
قویلانماسی کامیلاً طبیعی و مومکون نظره گلیر, چون قارداشی ایمام حسن(ع) و بنی
هاشمین بیر چوخ بؤیوکلری بو قبریستاندا قویلانیبلار. آما بوکی حضرت زینبین(س) او عظمت
و شخصیتی‌اینن قبری موشخص اولماسین سوآل یئری وار. بیر حالداکی مدینه شهری و
قبریستانلاری باره‌ده یازیلان کیتابلاردا او حضرتین قبریندن آد گلمه‌ییب. بونونلا
بئله کی «ام البنین» کیمی خانیملارین آدلاری کی بو قبریستاندا
قویلانیبلار«وفاء الوفاء» کیمی کیتابلاردا یازیلیب.
دمشق
بعضیلری‌ده دئییرلر: حضرت زینب (س) مدینه‌یه
وارید اولوب مجلیسلر و محفیل‌لرده یزدیلرین جینایتلرین آچیقلایاییردی. مدینه‌نین
فرمانداری ماجرانی یزیده یازیر و یزید اونا دستور وئریر زینبی _مکه و مدینه‌دن
سووای_ هر هانسی شهره ایسته‌سه یوللاسینلار. حضرت زینب شاما گئدیر و بیر مودّت
سونرا اوردا دونیاسین دگیشیر. رحمتلیق شیخ عباس قمی اؤز اوستادی رحمتلیق محدث نوری
و آیریلاریندان نقل ائله‌ماغینان شام احتیمالینی داها گوجلو بیلیر. حسنین سابقى
«مرقد عقیله زینب» کیتابیندا یازیر کی حضرت زینبین (س) قبری دمشقین یاخینلیغیندا
زینبیه‌ده‌دیر.
بو نظرین طرفدارلاری اؤز دلیل‌لرین بئله
بیان ائلیرلر: مدینه‌ده قیتلیق و یوخسوللوق اولدو, عبدالله جعفر تصمیم توتدو
خانیمیسی حضرت زینبله (س) شاما –کی اوردا اکین یئری واریدی- کؤچسون, شاما سفر
ائلیه‌ندن سونرا حضرت زینب(س) دونیاسین دگیشدی.
شاید بو نظریه‌ده بو مسأله‌نین مطرح ائله‌مه‌سی
دوشونمه‌لی اولا چون کی هئچ تاریخی کیتابدا دمشقده بئله اکین یئریندن بیر سؤز
گلمه‌ییب و آیری طرفدن عبدالله ائله الی آچیق آدامیدی کی اونون الینده مال اموال
تاب گتیرمزدی, پس نئجه ایمکانی وار کی بئله بیر کندی و مزرعه‌سی اولسون؟
سؤزون خولاصه‌سی بو کی مصر احتیمالی‌نین
ایشکالی چوخدور, مدینه احتیمالی دلیل‌سیزدیر و نهایتده دمشق احتیمالی نظره داها
دوز گلیر. گرچی یئنه یقینی صورتده دئمک اولماز کی حضرت زینبین(س) قبری هاردادیر.
آما بونا دیقت یئتیرماغینان کی اهل بیت خانیدانینا منسوب اولان زیارتگاه بو شریفه
آیه‌نین میصداقیدیر «فِی بُیُوتٍ أَذِنَ اللَّهُ أَن تُرْفَعَ وَیُذْکَرَ فِیهَا
اسْمُهُ», بیر ده اهل بیتین (ع) دفن اولان یئری هر هارا اولسا, یاد و خاطیره‌لری
دیریدیر و عاشیق جماعتین سینه‌لرینده یئرلری وار.