تهران دانيشگاهي‌نين علمي هيئت عضوي دئدي: يالانچي و اينسان
اليله يارانميش عيرفانلار كاذيبديلر، چونكي اينسانين اساسي نيازلارينا دقيق و
كاميل صورتده جواب وئره بيلميرلر.
دؤكتور محمد صادق كوشكي يالانچي و اينسان اليله يارانميش
عيرفانلار باره‌سينده مهر خبرنيگارينا دئدي: اينسان معنوي بوعدلارا جيدّي
احتياجلارينا گؤره ايستير كي ياشاييشيندا معنوياتا بير يول تاپسين. بو بير فيطري
ايستكدير و دين و مذهبه ربطي يوخدور. يعني اينسانلار فيطرتلرينه گؤره معنويّته
چكيليرلر.
او آرتيردي: ايستاندارد يول كي دين بو زمينه‌ده تانيتديريب،
دينه دايانان عيرفاندير. آما بو عيرفاني تانيمايانلار و ديندن اوزاق اولانلار
آلتئرناتيو يوللار آختاريرلار. بونا گؤره كئچميشدن اينديه قدر يالانچي عيرفانلارين
بازاري كي همان طبيعي و عادي ياشاييشدا معنويته ال تاپماقدير، ايستي اولوب.
تهران دانيشگاهي‌نين علمي هيئت عضوي دئدي: هئچ وقت بو
توكانلارين كاسادليغينا شاهيد اولماياجاييق. چونكي اينسانلارين فيطري و طبيعي
احتياجلاريدير كي ياشاييشلاري‌نين اوزونه معنويت قاپيسي آچيلسين. ديني تانيان
اينسانلار طبيعتاً ريشه‌سي ديني اولان عيرفانلارين داليسي‌جن گئدرلر. بو
ايمكانلاري اولمايانلار دا مجبوردولار اللرينده اولاندان ايستيفاده ائله‌سينلر كي
همان يالانچي و اينسان اليله دوزلميش عيرفانلاردير. اينسان اليله يارانمالارينا
گؤره كاذيبديلر، چونكي اينسانين اساسي نيازلارينا دقيق و كاميل صورتده جواب وئره
بيلميرلر.
كوشكي دئدي: غيري ايلاهي عيرفانلارين هئچ بيري اينسانين
ياشاييشيندا حقيقي معنويّتي يارالدا بيلمه‌ييب. هميشه بو بازار رونقلي اولوب و لاب
موهوم ضرري اينسان معنويتي‌نين بوش قالماسيدير. يعني بو عيرفانلار اينسانين
سوسوزلوغونا قانيق وئرمير، سوسوز آداما بنزير كي دريا سويو ايچير آما بو سو اونو
دويورمور، او قدر ايدامه وئرير كي اونون اؤلومونه سبب اولور. يالانچي عيرفانلار
اينسانين معنويّت سوسوزلوغونو دويورماق عوضينه شور سو ايچيرديرلر و اونو
اؤلدورورلر.
او يالانچي عيرفانلارلا موباريزه يولونو ايلاهي و ديني
عيرفانلاري تانيتديرماقدا بيليب دئدي: ايلاهي عيرفاني جماعتين ياشاييشيندا جاري
ائله‌ساق معصوملارين ياشاييشي اساسيندا كي عيرفاني جاميعه‌ده پياده ائليه بيله‌ريك.
او دا جماعتين ياشاييشي‌نين بير بؤلومو كيمي نه فوق‌العاده بير برنامه كيمي.
كوشكي دئدي: معصوملار بشرين معنويته اولان احتياجينا واقيف‌ايديلر
و عيرفان ياشاييشلاري‌نين آيريلماز بؤلومو ايدي. بونا گؤره معصوملاردان بئله بير
ياشاييش طرزيني گؤتوره‌نه عيرفان داليسي‌جن گئتمگه احتياج يوخدور، چون حقيقي
عيرفان ياشاييشدان آيري دئييل.
او آرتيردي: جنگده بيزيم رزمنده‌لريميز بو تجروبه و ياشاييش
طرزيني معصوملاردان آلديلار و ياشاييشلاريندا جاري ائله‌ديلر و يوخاري عيرفاني
مقاملارا ال تاپديلار. بو عيرفانا ال تاپيب درك ائدنلر اؤز ياشاييشلاريندا و اهل
عيالينان رابيطه‌ده و تك به تك بيولوژيك رفتارلاريندا اونو رعايت ائلرلر و بو
زمينه‌لرده موفّقديلر. بيري بو عيرفانا چاتيب ياشاييش طرزينه چئويرسه بوتون
اينحيرافي قاپيلار اوزونه باغلانار چونكي بو عيرفان لاب دقيق و عين حالدا لاب ساده
عملي عيرفاندير.
كوشكي بو باره‌ده كي آيا جاميعه‌ده كي يالانچي عيرفانلار
دوشمنلرين سازمان وئرديگي ايقدامدير، دئدي: قطعاً بو عيرفانلارين زمينه‌سي جاميعه‌ده
وار. دوشمن‌ده بو حاضير زمينه‌دن حداكثر ايستيفاده‌سين ائلير. بو زمينه‌لرين بيري‌ده
كيلاسلارين سازمان وئرمه‌سي و جوانلارين معنوي بوشلوغون بو عيرفانلارينان
دولدورماسيدير.