تحف‌العقول كيتابيندا
ايمام هادي‌دن(ع) بير نامه ثبت اولوب كي جبر مسأله‌سينه و كلامي شوبهه‌لره جواب
وئريبلر؛ او حضرت بو نامه‌ده قورآنين مرجع اولماسينا تأكيد بويوروب و نمونه اوچون
ثقلين حديثيني قورآنينان موقاييسه ائديب و اونو تأييد ائدن آيه‌لري ذيكر بويوربلار
و سونرا ايكي جبر و تفويض مسأله‌سينه ايشاره ائديب قورآن آيه‌لرينه اساساً
اونلارين دوز اولماماسينا تأكيد ائديبلر.
مصطفي صادقي ايكنا اينن
دانيشيقدا دئدي: ايمام هادي‌نين (ع) آيري لقبي «نقي»دير كي پاك و پاكيزه
معناسيندادير، كيتابلاردا و ريوايتلرده چوخراق ابوالحسن عسكری‌يه مشهوردور؛ اوغلو
ايمام حسن (ع) كيمي كي ابومحمد عسكری آدلانار.
او آرتيردي: بيليريك كي عرب چوخراق كونيه‌دن ايستيفاده ائدر
و يئنه بيليريك كي بو ايكي ايمام او زمان پايتخت و هابئله نيظامي مركز اولان
سامرادا ياشاييرديلار و بو عيلّته عسكري آدلانميشلار. البته آيري افراد دا عسكري‌يه
مشهوردولار كي اونلاردان مقصود سامرا دئييل؛ بلكه عسكر آديندا بير منطقه‌دير.
او ايمام هادي(ع) و اونون زيندگانليغي و او حضرتين زمانيندا
سياسي و فرهنگي وضعي باره‌ده دئدي: ايمام هادي (ع) 212 هيجري قمري ايلينده مدينه‌ده
دونيايا گؤز آچدي و 254-ده سامرادا شهادته يئتيشدي. بير عيدّه او حضرتين شهادتين
رجبين اوچو بيليرلر. صادقي آرتيردي: او حضرت زيندگانليق دوراني چوخراق «متوكل»ين
خلافتي زماني اولوب. اونون خلافتي زماني كربلا تخريب اولدو و ايماملار نظارت
آلتيندا قالديلار.
اهل بيت سيره و تاريخي پژوهشكده‌سي‌نين شيعه تاريخي
گروهونون موديري سؤزلري‌نين آيري بؤلومونده او دوراندا غلاةلارين فعاليتينه ايشاره
ائديب و دئدي: آيري طرفدن شيعه توندرولاري و غالي‌لرين فعاليتي كي ايماملاري(ع)
اينسان و نمونه اولماقدان چيخارديب آللاهليق جنبه‌سي وئرميشديلر، چوخالميشدي.
صادقي «تحف‌العقول»دا
نقل اولان و ايمام هادي‌يه(ع) منسوب اولان نامه‌ده ايمامين فرماييشلري‌نين ايدامه‌سينه
ايشاره ائديب دئدي: او زاد كي اوندا اصلاً شك يوخدور، قورآندير و بوتون فيرقه‌لر
اوندا ايتّيفاقي نظرلري وار. پس قورآن بير ريوايتين دوزلوغونا شاهيد اولسا،
موسلمانلارين بعضي‌سي اونو قبول‌دا ائله‌مه‌سه‌لر ده، اونا ايقرار ائله‌ماق
لازيمدير. سونرا ايمام(ع) ميثال اوچون ثقلين حديثين نقل ائديب و اونو تأييد ائله‌ين
آيه‌لري بويورور.
او آرتيردي: ايمام(ع) ايدامه‌ده ايكي جبر و تفويض
موضوعلارينا ايشاره ائديب و قورآنا ايستيناداً اونلارين دوز اولماماسينا تأكيد
ائلير. بو مطلب بوتون ائمه‌نين(ع) سيره‌سينده وار كي قورآني اؤز ريوايتلرينه شاهيد
مرجع تانيتديريبلار. بونا گؤره بير شئي نقل اولسا كي قورآنينان موافيق اولمايا،
قبول اولمالي دئييل؛ هرچند كي ايماملارا(ع) نيسبت وئريله.