ايسلامي عيرفان موعليمي، علامه طباطبايي‌نين(ره) دوشونجه‌سينده ناب توحيدين
مئحورليغينا ايشاره ائديب تأكيد ائله‌دي: دئمك اولار كي الميزاندا توحيدي ناب عيرفان
هر شئيدن اوستوندور كي علامه‌نين بو عيرفاني باخيشي‌نين اساسلاري ائمه اطهارين(ع)
توحيدي تعليماتي ساييلير.
محمد باقر خيري راد، ايسلامي عيرفان موحقيق و موعليمي ايكناينان دانيشيقدا
الميزانين خصوصيتلري و فلسفه و عيرفانين علامه طباطبايي‌نين تفسيري باخيشيندا
قويدوغو تأثيري باره‌ده صؤحبت ائله‌دي.
او بونا ايشاره ائله‌ماغينان كي علامه طباطبايي‌نين آيري موفسيرلرينن فرقي،
اونون قورآن آيه‌لرينده اوزون مودّت دوشونماقلاري‌دير، دئدي: اونون احوالاتيندا
گليب كي موختليف بوش واختلاريندا، قورآن آيه‌لرينده دوشونرديلر.
بو قورآني موحقيق، الميزانين موشخص ويجهه‌سي اولان علامه طباطبايي‌نين عيرفاني
باخيشينا تأكيد ائله‌ييب و آرتيردي: او قورآن آيه‌لريني ائله ناب توحيدينن تفسير
ائليردي كي معصوم ايماملارين(ع) سيره‌سينه ديقّت يئتيرماغينان اونا ال تاپميشدي.
خيري راد ايدامه‌ده بونو دئماغينان كي علامه طباطبايي، علامه‌نين قاضي كيمي
اوستادي واريدي كي اوندان چوخ تأثير آلميشدي، دئدي: علامه‌نين دوشونجه‌سينده ناب
توحيدين مئحورليغينا ديقّت يئتيرماغينان، دئمك اولار كي، بوننان بئله كي سونّت
اهلي‌نين عيرفاني‌اينن تانيش‌ايدي، شيعه عيرفاني‌نين ساليكي ساييليردي و اونون
دوشونجه‌لري‌نين اساسلارين ائمه اطاهرين(ع) توحيدي باخيشلاري شكل وئريبدير.
او بونا ايشاره ائله‌ماغينان كي علامه طباطبايي جاميعه‌نين موختليف قيشرلرين
حتّي عادي جماعتي موخاطب توتوب، ايدامه وئردي: بونا خاطير علامه عيرفانين اينجه و
تخصوصي يئرلرينه واريد اولماييب تا بو كيتابي هامي درك ائليه بيلسين و اگر
الميزاندا محض عيرفاني جنبه‌لري گؤرموروق، ائله بو محدوديته خاطيردير.
بو موحقيق تأكيد ائله‌دي: بونا رغماً كي الميزانين غاليب گيراييشي فلسفي‌دير،
آما الميزانين فلسفي بحثلري درين عيرفاني اساسيندا قورولوب كي گاهدان ايستيدلال
صورتينده و گاهدان فلسفه ايصطيلاحلار صورتينده گليب.
او علامه طباطبايي‌نين فلسفي مئتودونون ملاصدرا ايله اوخشارليغينا ايشاره
ائديب دئدي: او، ملاصدرادان تبعيّت ائله‌ماغا خاطير چاليشير عيرفاني مفهوملاري و
اينجه‌ليقلاري فلسفه و ايستيدلال ديلي‌ايله بيان ائله‌سين و بو مئتود مخصوصاً
«رسائل توحيديه» كيتابيندا داها آيدين گؤروشور. بو مئتود «الميزان»دا دا وار.
ايسلامي عيرفان موحقيقي، ايدامه‌ده علامه طباطبايي‌نين ملاصدرادان اوستون
اولماسينا ايشاره ائله‌ماغينان و بونو دئماغينان كي علامه طباطبايي ملا صدرادان
تئز تفسيره باشلاييب، آرتيردي: ملا صدرا اؤز تفسيري‌نين موقدمه‌سينده يازيب كي
قورآن موريدينده يازاندان سونرا بو نتيجه‌يه چاتيب كي اؤز عؤمرونو غيري قورآني
تحقيقلرده تلف ائله‌ييب و افسوس ائلير كي ائي كاش قورآن تفسيرينه تئز باشلايايدي.
او بونو دئماغينان كي اسماعيليه كيمي بعضي موفسّيرلر باطيني تفسيرده ايفراط
ائله‌ييبلر و گاهدان دليلسيز ايدعالار ائله‌ييبلر، تأكيد ائله‌دي: علامه طباطبايي
معصوملاردان(ع) گلن ريوايتلره موقيّد اولدوغو اوچون داها چوخ چاليشيب كي كولّي
مفهوملاري ميصداقلارينان تطبيق وئرديرسين كي ايصطيلاحدا «جري» آدلانار و بو
معنايادير كي زمان بويوندا كولّي مفهوملار جوزئي ميصداقلارا حمل اولسون.
قورآني علملر موحقيقي ايدامه‌ده ايمام صادقدن(ع) بير حديث نقل ائله‌دي كي او
حضرت بويورور: «القرآن يجری كما تجری كالشمس و القمر؛ قورآن گونش و آي كيمي هميشه جرياندادير»
و آرتيردي: بو سؤز بو معنايه‌دير كي بير قورآني مفهومي زمان كئچدكجه موختليف
ميصداقلارا حمل ائله‌ماق اولار و علامه طباطبايي قورآن مفهوملارينا دقيق ميصداق
تاپماغينان و گاهدان صحيح ريوايتلردن ايستيفاده ائله‌ماغينان بو ايشيقلي حديثين
مسيرينده آدديم آتيب.
او بو نتيجه‌ني آلماغينان كي الميزان تفسيريني، مفهوملارا ميصداق تاپماق و
ريوايتلريه دايانماغا خاطير، تايسيز بير باطيني تفسير آدلانديرماق اولار ، دئدي:
علامه طباطبايي بو مئتوددان ايستيفاده ائله‌ماغينان، اسماعيليه كيمي آيري باطيني
گروهلارين خيلافينا، ايفراط ورته‌سينه توشمه‌ييب.