«هيك» نظريه‌لري‌نين ايسلام سونّتي‌اينن ياخينليغي/اخلاقي فضيلتلرين كسبي
اوچون شرّين ضرورتي
تهران دانيشگاهي‌نين فلسفه اوستادي «جان هيك»-ين «خير و شرّ» نظريه‌سين
تشريح ائله‌ماغينان دئدي كي هيكين عقيده‌لري ايسلاما ياخيندير. او دئدي: آللاهين هدفي
بو خيرلي-شرّلي دونياني ياراتماقدان بو ايدي كي اخلاقي فضيلتلر طبيعي فضادا تربيت تاپسين
و بئله‌دير كي اينسان آللاها بنزر اولار و آللاه صورتي مرحله‌سيندن آللاها بنزرليق
مرحله‌سينه چاتار.
مهر خبرنيگاري‌نين گوزاريشينه گؤره؛ دؤكتور اميرعباس علي‌زماني تهران
دانيشگاهي‌نين اوستادي«جان هيك نظريه‌لرين آراشديرما» ايجلاسيندا دئدي: جان هيك او
موتفكيرلردندير كي ديني، مودئرن دونيادا صاديقانه صورتده بيان ائله‌ماغا چاليشير.
او دئدي: هيكين، كيتابيندا گتيرديگي مسأله، شرين اولماسي و اونون آللاهين
اينسانلارا اولدوغو عشقينين رابطه‌سيندن بحث ائدير. حقيقتده مسيحيتين، آللاها عشق آللاهي
كيمي تأكيد ائله‌مه‌سي، واقعي و دونيادا اولان مسيحيتدن فرقليدير. اگر آتا اوشاقلارين‌نين
عاشيقي اولسا بو عشق اوشاقلاريندا تجلّي تاپماليدير حال بوكي نيشانه‌لر وار كي بوگونكي
دونياميزدا بو عشقدن خبر يوخدور.
بو غرب فلسفه‌سي اوستادي آرتيردي: جان هيك نظريه‌سي‌نين ريشه‌سي ايرئانوس
قوردوغو نظريه‌يه يئتيشير. او كليسانين اصلي متألّئهلرندندير كي اينسانا خاص نظري وار
و بو نظري موثبت دگرلنديرماق اولار.
او جان هيكين نظريه‌سينده شرّ مسأله‌سينه ايشاره ائديب دئدي: هيك آگوستينين
خيلافينا، «بيرينجي گوناهي» اوسطوره بيلير و اعتيقادي وار كي شرّ مسأله‌سي نه تكجه
مؤمونلره بلكه مؤمون اولمايانلارا دا موهومدور.
او تأكيد ائله‌دي: هر ايش توتدوغوموز هدف و غايته گؤره خير و يا شر اولور،
ايتي پيچاق كيمي. بو دونيادا هر نه‌يي خير يا شر آدلانديرساق معمولاً بير مبناسي اولور.
دؤكتور علي زماني آرتيردي: بعضيلري شخصي لذّتلري مبنا قويورلار و دئييرلر
چون بعضي سببلر بو لذّت و دينجليغي مندن آلير پس شرّ واردير. حال بو كي هيكين اعتيقادينا
گؤره اگر آللاهي نظرده آلساق آللاهين بوتون ائله‌ديقلاري خيردير. هيك بير ميثالينان
آيدينلادير كي اوشاغينا عاشيق اولان آتا ايسته‌يير اونداكي ظرفيّتلر كمالا چاتسين،
بونا گؤره ظاهيرده شرّه اوخشايان مسأله‌لرين اولماسي‌اينن، بو اخلاقي فضيلتلر و ارزيشلر
معنا تاپير.
او دئدي: جان هيكه گؤره اينسانلار نهايتاً اخلاقي خيره چاتارلار و آللاهين
هدفي اخلاقي فضيلتلرين طبيعي فضادا پروريش تاپماسيدير و بئله‌دير كي اينسان آللاها
بنزر اولار و آللاه صورتي مرحله‌سيندن، آللاها بنزرليق مرحله‌سينه چاتار.
تهران دانيشگاهي‌نين فلسفه اوستادي آرتيردي: هيك دئيير كي بو دونيادا
بيز ائله واريق كي آللاه اؤزونو موستقيم صورتده بيزه آشكار ائله‌مير چونكي او جور اولسا
اينسانين ايمان گتيرمگه شانسي اولماز. بونا خاطير موبهم و ياري گيزلي بير فضادا اؤزونو
گؤرسه‌دير تا اينانماق و تانيماق آزادليغي اولسون و حقيقتده علمينن همراه اولان آزاد
ايمانين لازيمه‌سي بو موبهم فضانين اولماسيدير.
او آرتيردي: جان هيك بو دونيانين اساسين ايختياردا بيلير و دئيير كي گرك
اينسانين هم خير ايراده‌سي و هم گوناه ايمكاني اولسون و اگر بيري سوروشا كي نييه آللاه
ائله دونيا ياراتماييب كي گوناه ائله‌ماق ايمكاني اولماسين؛ حقيقتده بو او معنايه‌دير
كي گوناه ائله‌ماق ايمكاني اولماسين و ايختيارينان خير ايش گؤرماق ايمكاني‌دا اولماسين.
بو فلسفه اوستادي آرتيردي: هيك بئله اينانير كي آللاهين هدفي بودور كي
اينسان طبيعي بير ساواشدا اخلاقي فضيلتلري ايختياري صورتده اله گتيرسين. هيك دئيير
ايختيارلي و آزاد اينسانلي بير دونيا، بونلارسيز دونيادان داها ياخجيدير. اينسانين
اخلاقي فضيلتلره چاتماسي اوچون بير دونيايا احتياجيميز وار كي شرارتين معناسي اولسون
تا اونون موقابيلينده دوزلوق، ايثار و شوجاعتين و . . . معناسي اولسون.
دؤكتور علي زماني بونا تأكيد ائله‌ماغينان كي هيكين
اينمالاري ايسلامي تفكوره ياخيندير، دئدي: هيك بئله اينانير كي آللاهين هدفي اينساني
تربيت ائله‌ماقدير، نه بو كي بير دونيا ياراتسين كي اينسانلار اوندا لاب چوخ لذت آپارسينلار.
هيك، اينسان اوچون خوش بير گله‌جك ترسيم ائلير.