حجتالاسلام مسعودی قومون علميه حوزه‌سي‌نين اوستادلاريندان
دئدي: موعانيدلر حضرت امير المؤمنين علي (ع) مين ركعتليق نامازلارينا شك ائليرديلر
تا بو كي علامه اميني بو مسأله‌نين دوزلوغون ثابيت ائله‌ماغا خاطير ايمام
رضانين(ع) حرمينده بير گئجه‌ده مين ركعت ناماز قيلدي.
فارس خبرگوزاريسي‌نين آيين و انديشه خبرنيگاري‌نين
گوزاريشينه گؤره، ربيع‌الثاني‌نين 28-ي «الغدیر» كيتابي‌نين يازاري علامه
«عبدالحسین امینی» وفاتي‌نين ايل دؤنومونده قومون علميه حوزه‌سي‌نين حديث و رجال
اوستادلاري‌نين بيري حجتالاسلام والمسلمین محمد مسعودی اينن بير دانيشيق
آپارميشيق كي آشاغيدا گلير.
علامه امینی(ره) شيعه دونياسي‌نين مومتاز شخصيتلريندندير
حجت الاسلام مسعودی دانيشيغين اوّلينده دئدي: علامه
امینی(ره) شيعه دونياسي‌نين مومتاز شخصيتلريندندير. اونون شخصيتي تايسيزيدي و
اونون كيمي يازار و مؤليف يوخيدي كي شيعه دونياسينا دَيَرلي خيدمتلر ائله‌دي.
او دئدي: اونلار الغدير كيتابين يازماغينان لاب يوخاري
خيدمتلرين امیرالمومنین علی علیه‌السلاما ائله‌ديلر.
بو اوستاد آرتيردي: الغدير كيتابين اؤزونه مخصوص خصوصيتلري
وار. البته الغديردن قاباق آيري كيتابلار غدير واقيعه‌سينه گؤره يازيلميشدي؛ آما
او گونه‌جن غدير واقيعه‌سيني قطعي و موستدل ائليه‌ن اولماميشدي. او آرتيردي:
رحمتليق علامه امینی(ره) غدير واقيعه‌سيني دوستا دوشمنه ثابيت ائله‌دي و دئدي كي
غدير قطعاً ايتّيفاق توشوب.
غديرين ايكي مسأله‌سي وار؛ غديرين واقع اولماسي و پيغمبر
اكرمين(ص) خوطبه‌سي
قومون علميه حوزه‌سي‌نين اوستادي دئدي: غديرين ايكي بحث
اولمالي مسأله‌سي وار؛ بيري غديرين واقع اولماسي و بيري ايسلام رسولونون(ص)
بويوردوقلاري خوطبه.
او دئدي: علامه اميني غديرين واقع اولماسيني هامي‌يا موسلّم
ائله‌دي و چوخ مؤحكم دليل‌لرينن اونو غدير دوشمنلرينه‌ده ثابيت ائله‌دي.
مسعودي آرتيردي: عربي ديلينده اولان الغدير كيتابيندا كي 10
جيلدده چاپ اولوب، اونلار نئچه موضوعدا بحث ائله‌ييبلر. بيرينجي، قورآن و او آيه‌لر
كي غدير واقيعه‌سينه دلالت ائديرلر. ايكينجي غدير موريدينده اولان ريوايتلر.
حديث علملر اوستادي غدير ريوايتلري باره‌ده دئدي: غدير
ريوايتلري ايكي دسته‌دن عيبارتدير؛ بيري او ريوايتلر كي او خبرلره شاميل اولور كي
غديرين اولماسينا دلالت ائلير و بيري او ريوايتلر كي امیرالمؤمنین علی علیه‌السلام،
موختليف زمانلاردا اؤز حقلري‌نين احقاقي اوچون غدير واقيعه‌سينه ايستيناد ائديبلر.
علامه اميني(ره) بونلارين هاميسين گتيريب و نقل ائديب.
مسعودي آرتيردي: اونلار نقل اولان حديثلرين راوي‌لريني
آراشديريب و اونلارين طبقه‌لرين موعيّن ائله‌ييب كي بو ايشلر حديث دونياسيندا
بؤيوك ايشلر ساييلير.
حجتالاسلام مسعودی دئدي: اونلار سونراكي مرحله‌ده بو
زمينه‌ده اولان شعرلر و شاعيلري ييغيب يازيبلار. بيرينجي عصردن و ايماملارين علیهم‌السلام
عصريندن غدير واقيعه‌سينه گؤره قوشولان شعرلر، هم اونلار كي ايماملارين علیهم‌السلام
محضرينده اوخونوب و هم اونلار كي آيري زمانلار و آيري يئرلرده اوخونوبلار تا علامه‌نين
اؤز زمانينه‌جن، هاميسيني ييغيبلار. يعني هر قرنده كي غديرين موخاليف و موافيقلر
اونو شعره چكيبلر هاميسين نقل ائديب.
امیرالمؤمنین علی (ع)-ين نامازلارين ثابيت ائله‌ماق اوچون
علامه اميني‌نين مين ركعتليق نامازي
حجتالاسلام مسعودی علامه اميني‌نين حالاتي باره‌ده دئدي:
اونلارين عجيب احوالاتي واريدي كي ايكيسين نقل ائليرم. ائشيتميشيق كي امیرالمؤمنین
علی علیه‌السلام هر گئجه مين ركعت ناماز قيلاردي. بو مسأله بير عيدّه موخاليفلر
طرفيندن نقد اولوب كي مگر بير اينسان بير گئجه‌ده نه‌قدر ناماز قيلا بيلر. علامه
اميني‌نين احوالاتيندا وار كي موقدّس مشهد شهرينه اولان سفرلري‌نين بيرينده، گئجه‌لر
حرمده مين ركعت ناماز قيليردي كي ثابيت ائله‌سين بو ايشين ايمكاني وار.
حجتالاسلام محمد مسعودی دانيشيغي آخيرينده دئدي:
موتعال آللاهدان ايستيرم بيزي بؤيوكلريميزين مخصوصاً علامه اميني‌نين قدريني
بيلنلردن قرار وئرسين.