جامعة المصطفی(ص) العالمیه‌‌نين علمي هيأت عضوي بونا تأكيد
ائله‌ماغينان كي اخلاقي كمال‌لارين چوخو كي زيندگانليغين غايتي حساب اولور، تكجه
جاميعه قاليبينده موحقق اولور، دئدي: ايمام سجادين(ع) حقوق رساله‌سي، شهروندليق
اخلاقي منبعلريندندير.
حجت الاسلام والمسلمین محسن غرویان جامعة المصطفی(ص)
العالمیه‌‌نين علمي هيأت عضوي مهر خبرنيگاري‌اينن شهروندليق اخلاقي باره‌ده
دانيشقدا دئدي: بو سؤز ايكي اخلاق و شهروندليق كلمه‌لريندن موركبدير؛ اخلاقين كي
اؤزونه مخصوص معناسي وار و عملي حيكمتلرين بيري و عملي عقلين دئيتالارينداندير كي
اؤز يئرينده تعريفي وار.
او آيدينلاتدي: بونا گؤره لازيمدي شهروندليق كلمه‌سي تفسير
اولسون. منيم نظريمه بو شهروندليق اخلاقي‌نين چوخ بحثلري موعاشيرت آدابينا قاييدير
كي ايسلامي اخلاق كيتابلاريندا و كتاب‌العشره‌ده گليب، هابئله اصول كافي‌ده بو
رابيطه‌ده چوخلو ريوايتلر وار.
حوزه و دانيشگاه اوستادي سؤزلري‌نين داليسيندا دئدي: علامه
طباطبايي تنظيم ائدن سنن‌النبي كيتابيندا دا بونا گؤره گئنيش بحثلر وار هر كسين
علاقه‌سي اولسا بو اخلاق كيتابلارينا موراجيعه ائده بيلر.
«صحيفه سجاديه موضوع اساسيندا» كيتابي‌نين يازاني دئدي:
شهروندليق اخلاقي‌نين لاب موهوم مبنالاريندان اينسانين كرامتي‌دير يعني اينسان گرك
بو ايناما يئتيشه كي آيري اينسانلار تكريم و تعظيم اولماليدير. بو باخيش مبنا
اولسا اوندا اينسان دانيشيقدا، باخماقدا و اؤزگه‌لرينن ايرتيباطدا او مبنانين
اثرلرين گؤرسه‌ده‌جاق و بونلار بير يئرده شهروندليق اخلاقي اولاجاق. قونشولار،
يتيملر، يوخسول‌لار و قوهوملارين حقلريني رعايت ائله‌ماق بارهسينده ايسلامي
ريوايتلر و آيه‌لرده وار كي بونلاري بير-بيري‌نين كنارينا قويساق شهروندليق اخلاقي
آديندا بير مجموعه‌ميز اولاجاق.
«اوستاد حسن زاده آملي
محضرينده» كيتابي‌نين يازاني دئدي: آيري مسأله بوكي اينسان طبعيتاً مدني موجوددور
يعني بيز گرك جاميعه‌ده ياشاياق، اينسان ياشاييشي‌نين غايتلري حساب اولان اخلاقي
كمال‌لارين تكجه جاميعه قاليبيندا موحقق اولار مثلاً ايثار، احسان، يتيملرين
اللريندن توتماق و ... . اينسان جاميعه‌ده ياشاماسا بو كماللارا چاتماز. هر حالدا
منيم شهروندليق اخلاقيندان تعريفيم بو موريدلرين هاميسيندان بير كولي برداشتدير كي
بو تعبيرينن دئيه بيله‌رم: اينسانين آيريلارين موقابيلينده مجموعه رفتاري،
شهروندليق اخلاقي آدلانير.
جامعة المصطفی(ص) العالمیه‌‌نين علمي هيأت عضوي
سؤزلري‌نين ايدامه‌سينده ريوايتلر و آيه‌لرين شهروندليق اخلاقينا تأكيد ائله‌ماقلاري
باره‌ده دئدي: قورآن آيه‌لرينده گؤروروك كي آتا-آنا حقينده احسان ائله‌ماغا توصيه
اولونوب، يا آيري آيه‌ده يوخسول‌لار و يازيقلار بارهسينده سيفاريش اولوب. بوجور
آيه‌لر بيزه ميصداقي صورتده اؤيره‌دير كي آيريلارينن نئجه ترپشاق. اخلاق بارهسينده
ريوايتلريميز ده چوخدور كي چوخلو بابلاردا گليبلر مثلاً ناخوشلار، يازيقلار،
يتيملر و قوهوم قونشولارين عيادتي.
غرويان بونا تأكيد ائله‌ماغينان
كي ايمام سجادين(ع) حقوق ريساله‌سي، شهروندليق اخلاقي منبعلريندن اولا بيلر، دئدي:
حاكيمين رعيتله داورانماسي و جماعتين بير-بيرينن نئجه داورانماسي بو ريساله‌ده
گليب. هابئله نهج البلاغه‌ده شهروندليق اخلاقي باره‌ده چوخلو موريدلر وار. حضرت
علي‌نين(ع) مالك اشتره اولان نامه‌سي كيمي كي شهروندليق اخلاقي فضاسيندا تفسير
اولا بيلر.