اللّهم
إنّی أعوذ بک من الکرب والبلاء؛
محرّمين ايكينجي گونو و حسيني كروانين
كربلا چؤلونه واريد اولماسي
61-جي هيجري ايلين محرم آيي‌نين ايكينجي
گونونده، ايمام حسين(ع) كرواني «حرّ بن یزید ریاحى»نين قوشونو ايله «كربلا»
واديسينه واريد اولدو و بو زماندا ايمام حسين (ع) بويوردو: «اللّهم إنّی أعوذ بک
من الکَرْب والبلاء».
اوندان سونرا كي «حرّ بن یزید ریاحى»
«عبیدالله بن زیاد»ين امري‌اينن «ذو حُسُم» منطقه‌سينده ايمامين كوفه‌يه گئتمه‌سينه
مانع اولدو، ايمام حسين(ع) كرواني‌نين حركتي «کَرْب و بَلا»يه باشلاندي.
كربلانين تاريخي چوخ قديميدير و بابول‌ليلره
چاتير، آما كربلانين ايسلامدان قاباقكي تاريخيندن دقيق خبر يوخدور. كربلا بغدادين
جنوب غربي‌نين 105 كيلومترليگينده‌دير و كربلا اوستاني‌نين مساحتي 6 مين كيلومتردن
چوخدور.
حسيني كروان، پنجشنبه گونو، 61-جي هيجري
ايلين محرم آيي‌نين ايكينجي گونونده «نينوا» چؤلونه چاتدي. بير مؤحنتلي يئر كي
پيغمبر اكرم (ص) قاباقجادان خبريني ايمام حسينه(ع) وئرميشدي.
«مجمع‌الزوائد»ده گليب كي: سونّي
عاليملردن اولان «احمد بن حنبل»، پيغمبردن ريوايت ائدير كي بويوردولار: «دخل علیَّ
البیت ملک لم یدخل علیَّ قبلها فقال لی: إنّ ابنک هذا ـ یعنی حسیناً ـ مقتول. وإنْ
شئت أریتک من تربة الأرض الّتی یقتل بها»، فريشته‌لرين بيري كي اينديه‌جن منيم
يانيما گلمه‌ميشدي، منه واريد اولدو. منه دئدي: البته سنين اوغلونو-يعني حسيني(ع)-
اؤلدوره‌جكلر و ايسته‌سن شهادت يئري‌نين توپراغين سنه نيشان وئريم.
هابئله آيري مُتواتير حديثلرده ايمام
حسينين(ع) شهادت خبريني پيغمبرين ديليندن نقل ائديبلر. بو زمينه‌ده آيري حديث
كيتابلاري او جومله‌دن الکبیر بخارى تاریخي ، البدایة والنهایه، اُسد الغابة،
الاصابة، الخصائص الکبرى، کنز العمّال و خصائص الکبرى كيتابلارينا ايشاره ائتمك
اولار.
سيد بن طاووسون «لهوف»وندا گليب كي ايمام
حسين(ع) كرواني «موضع البلاء»يه چاتاندا، او حضرتين آتي داياندي. ايمام او چؤلون
آدين سوروشدو و جواب ائشيتديلر: «غاضریه». ايمام حسين(ع) بويوردولار: بو چؤلون
آيري آدي دا وار؟ دئديلر: «شاطی الفرات». يئنه ايمام او چؤلون آيري آدين سوروشدو و
بو دفعه جواب ائشيتدي: «كربلا».
بو زماندا ايمام بير آه چكيب بويوردو:
«اللّهم إنّی أعوذ بک من الکَرْب والبلاء».