موسي بن محمد دئيير: بير گون يحيي بن
اکثمي گؤردوم. مندن نئچه سوآل سوروشدو، سونرا قارداشيم ايمام هادي‌نين(ع) محضرينه
گلديم و اوننان دانيشقلار آپارديم كي اونون ايطاعتين منه لازيم ائله‌دي.اونلاردان
سوروشدوم: قوربانين اولوم! يحيي بن اکثم مندن نئچه سوآل سوروشوب و جواب ايستير.
ايمام هادي(ع) بويوردو: اونون جوابين
وئردين؟
دئديم: يوخ اونلارين جوابين بيلميرديم.
امام هادي (ع) بويوردولار: سوآل‌لار نه‌ايديلر؟
دئديم: بير يازي وئردي كي اوندا
يازيلميشدي: آللاه تعالا قورآندا بويورور: « كيتابدان اوندا بهره اولان شخص
(سليمانا) دئدي: من (سبا ملكه‌سي‌نين)تختيني سن كيپليك وورماميش بورا گتيره‌رم.»(1)
سوآل سوروشان حضرت سليمان و جواب وئرن آصف(بن برخيا)دير. آيا پيغمبر آصفين علمينه
احتياجي وار؟
و بو آيه‌ده «اگر سنه گؤندرديغيميزدا
شكّين اولسا، اوندا آسماني كيتابلارين اوخويانلاريندان سوروش»(2) اگر بو آيه‌نين
موخاطبي پيغمبر اؤزو اولسا پس، او دا شكّه دوچار اولوب و اگر موخاطب آيريسي اولسا،
اوندا قورآن كيمه نازيل اولوب؟ . . .
امام هادي (ع) بويوردو: بيله‌سينه ياز؟
دئديم: نه يازيم؟
بويوردولار: ياز بسم‌الله الرحمن‌الرحيم.
آللاه سني هيدايت ائله‌سين. يازديغين اليميزه چاتدي و ايستيردين اوننان بيزي
ايمتحان ائليه‌سن و اگر جوابيندا قصور اولسا، بيزه طعنه ووراسان؛ البته آللاه سني
اؤز نيّتينده موجازات ائده‌جاق. بيز سوآللاريوا جواب وئرميشوق، بيل و قولاق آس و
دوشونماغيوي اونون قاباغيندا ذليل ائله و اورگيوي اونا مشغول ائله، البته حوجّت
سنه قورتولوب. والسلام
بو آيه‌ده « كيتابدان اوندا بهره اولان
شخص (سليمانا) دئدي: من (سبا ملكه‌سي‌نين)تختيني سن كيپليك وورماميش بورا گتيره‌رم.»
سليمان، (آصف) بيلَنه و اوندان چوخا عاليميدي؛ لاكين ايستيردي اؤز اومّتينه جينّ و
انس اولاراق، بيلديرسين كي اوندان سونراكي حوجت، (آصف)دير و آصفين ائله‌ديغي
آللاهين امري‌اينن ايدي كي سليماندان اؤيرنميشدي تا اونون رهبرليغي و ويلايتينده
ايختيلاف يارانمايا و هامي‌يا حوجت تمام اولا.
و بو آيه ده «اگر سنه گؤندرديغيميزدا
شكّين اولسا، اوندا آسماني كيتابلارين اوخويانلاريندان سوروش» آيه‌نين موخاطبي
پيغمبرين اؤزودور و او حضرتده، بير ذرّه‌ده اونا گؤندريلن باره‌سينده، شك يوخيدي؛
لاكين جاهيل‌لر دئييرديلر: نيه آللاه ملكلردن پيغمبر مبعوث ائله‌مه‌دي؟نيه آللاه
اؤز پيغمبريني يئماقدان و كوچه‌لرده گئديب گلماقدان بي‌نياز ائله‌مه‌دي؟
بونا خاطير رسول اكرمه وحي ائله‌دي كي تا
جاهيل موعتريضلرين يانيندا، كيتابي (توراتي) اوخويانلاردان سوروشسون:
آيا آللاه اينديه‌جن بير پيغمبر گؤندريب
كي يئييب ايچمه‌سين و بازارلاردا گئديب گلمه‌سين؟( و چون بئله دئييل پس ائي محمد
سن‌ده اونلارا تايسان و بو موريدده آيريلارينان فرقين يوخدور.)
و بو كي آللاه تعالي: « فإن کنت في شک»
(اگر شكّين وار) تعبيريني ايشله‌ديب –بوننان بئله‌كي پيغمبرين هئچوقت شكّي يوخيدي-
بونا خاطير ايدي كي دانيشيق و موجاديله‌ده اينصافي رعايت ائله‌سين. نئجه كي آللاه
تعالا موباهيله آيه‌سينده بويورور: «(ائي پيغمبر كافيرلره)دئگينن: گلين هاميميز
اوشاقلار و آروادلاريميزي چاغيراق؛ سونرا موباهيله ائلياق و يالانچيلارا آللاهين
لعنتين گؤندراق»(3) اگر آللاه بويورسادي كي:«گلين آللاهين لعنتين سيزه گؤندراق،
اونلار حقّين دعوتين قبول ائله‌مزديلر. بونا گؤره بوننان بئله كي آللاه بيليردي
گؤندرديغي و پيغمبري دوز دانيشاندير و وظيفه‌سيني انجام وئريب و هابئله پيغمبر
اؤزو ياخجي بيليردي كي دئديقلاريندا صاديقدير لاكين بوجور ياخجي بيلدي كي
دانيشيقدا اينصافي رعايت ائده و يالانچيلاري ردّ ائده . . .
آلت يازيلار:
1- "قال الذي عنده علم من الکتاب
أنا آتيک به قبل أن يرتد اليک طرفک" (نمل سوره‌سي ، آيه 40)
2- "فان کنت في شک ممّا انزلنا اليک
فاسئل الّذين يقرؤون الکتاب" (يونس سوره‌سي ، آيه 94)
3- "فقل تعالَوا ندع ابنائنا
وابنائکم ونسائنا ونسائکم وانفسنا وانفسکم ثمّ نبتهل فنجعل لعنة الله علي
الکاذبين" (آل عمران سوره‌سي ، آيه 61)
منبع: تحف العقول، حسن بن شعبه حراني،
481 – 476-جي صفحه‌لر.