علي بن ابيطالب عليه السلامين زمانيندا
غدير بايرامي گونو جومعه‌اينن بيرگونه توشدو. ايمام اوگون موفصل خوطبه دانيشديلار
و توحيد، نبوّت و ايمامت باره‌سينده درين و دگرلي بحثلر ائله‌ديلر.
اونلار اوّلده آللاه‌تعالاني حمد و ثنا ائله‌ديلر،
رَبوي صيفتلرين سايديلار، نعمتلريني ديقّته گتيرديلر و سونرا جماعته دئديلر: آللاه
تعالا بوگون ايكي بايرامي (غدير و جومعه) سيزين اوچون بير يئرده قرار وئريب؛ ايكي
بايرام كي هر بيري اوبيري‌نين وارليق فلسفه‌سيني كاميل‌لشديرير. و هر بيري‌‌نين
وسيله‌سي‌اينن او بيريسينده هيدايت داها اثرلي اولور . . . سونرا بويوردو: توحيد و
آللاهين بيرليغينا اينانماق قبول اولماياجاق مگر پيغمبري حضرت محمد صلوات الله
عليه ريسالتينه اعتيراف ائده‌سن، و محدين (صلوات الله عليه) ديني قبول اولماياجاق
مگر بوكي آللاه، ويلاتي‌نين امريني وئرن شخصين ويلايتين قبول ائده‌سن، و بو
ايشلرين هئچ بيري سهمانا توشمز مگر بو كي ويلايت اهلينه توسّول و تمسّوك ائده‌سن.
سونرا بويوردو: آللاه تعالا غدير گونو،
اؤز سئچديغي باره‌ده ايراده ائله‌ديغيني پيغمبرينه گؤندردي. اونا امر ائله‌دي كي
ويلايت و ويصايتيني ايبلاغ ائله‌سين، كافير و مونافيقلردن مجالي آلسين و دوشمنلرين
سانجماسي‌نين نيگراني اولماسين. غدير گونونون منزيلت و قدري چوخدور، او گون
آللاهين رحمتلري يئتيشيب و حوجّت هامي اوچون قورتولوب. بو گون آيدينلاتماق گونو و
اوجا و آيدين يئردن عقيده‌ني دئماق گونوندور، بو گون دينين تكامول گونو و عهده وفا
ائله‌ماق گونودور.
غدير شاهيد (رسول الله صلوات الله عليه)
گونو و مشهود (علي ابن ابيطالب) گونودور. شيطانين ذيلّت گونو، بورهان و ايستيدلال
گونودور. اونو دانانلارين صفي‌نين آيريلماق گونودور. بو گون لاب بؤيوك گوندور كي
سيزدن بير عيدّه اوندان اوز چئويرديز. آللاه بنده‌لري‌نين، ايمتحان و هيدايت
گونودور. اوركلرده گيزلنميش كينه‌لرين آشكار اولان گونو، نوصوصون (پيغمبرين
ايبهامسيز سؤزلري)، مؤمونلره عرضه اولان گوندور. غدير گونو شيث پيغمبر گوندور،
ادريس گونو و يوشع و شمعون و . . .
غدير بايراميندا علوي منشورو
اميرالمؤمنان خوطبه‌نين آخيرينده
بويوردولار: ائي موسلمانلار آللاهين رحمتي سيزه اولسون. بو بؤيوك ايجتيماعدان
قاييداندان سونرا بو گونو بايرام توتون و بو ايشلري گؤرماغينان اونو عزيز سايين:
نعمتي خانيواده‌زه
و فامئل‌لريزه چوخالدين و باغيشلاماق و ياخجيليغي اؤزوزه پيشه ائدين.
آللاها سيزه
وئرديغي نعمتلر اوچون شوكر ائدين.
بير-بيريزين
كنارينا ييغيشين تا آللاه سيزين ايجتيماعزي چوخالتسين.
آللاهين
نعمتلرين بير-بيريزه تبريك دئيين نئجه كي آللاه بو گونده آيري بايراملاردان چوخ
اجز و ثواب وئرماغينان سيزه تبريك دئيير.
سئوينجاق و گولر
اوزونن بير-بيريزي قوجاقلايين.
گؤروش زماني
موصافيحه ائدين و بير-بيرزه تبريك دئيين.
منبع: اقبال الاعمال، سيد بن طاووس، صص 464-461