حضرت امام جواد (ع) 195 هجری قمری ایلین رجب آیی‌نین اونوندا مدینه شهرینده دونیایا گؤز آچدی. شیعه‌لرین دوققوزونجو امام امام جواد (ع) 203-جو ایلینده آتاسی امام رضانین (ع) شهادتیندن سونرا سککیز یاشیندا اماملیغا چاتدی.

امام جوادین (ع) خیردا یاشیندا اماملیغی شیعه‌لرین چوخونا عجیب گلیر حتّی بیر عده‌سی تردیده دوشور. بو مسأله اوزمان لاپ جنجال‌لی مسأله‌لرین بیریدی.

 خیرانی دئییر: آتام خراساندا امام رضانین محضریندها ولدوغونو تعریفله‌ییر، بیر او حضرت سوروشور: «سیزین باشیزا بیر شئی گلیرسه سیزدن سونرا جماعتین امامی کیمدیر؟» امام بویوردو: «ابوجعفر (امام جواد).» دئیه‌سن سوروشان بو جوابدان قانع اولمور آخی او زمانلار امام جوادین یاشی 7 جیواریندایدی. حضرت جوابدا بویوردو: «الله تعالی عیسی‌نی ابوجعفردن داها آز یاشیندا تازا بیر شریعتین پیغمبری کیمی سئچدی. بونا اساساً نه اشکالی وار الله ابوجعفری خیردا یاشیندا اماملیغا چاتدیرا».

مریم سوره‌سی‌نین 30-جو آیه‌سی حضرت عیسی‌نین بئشیکده بئله دئمه‌سینی تصریح ائلیر:  «اِنّی عَبْدُاللّهِ آتانِی الْکتابَ وَ جَعَلَنِی نَبِیّا؛ من الله‌ین بنده‌سی‌یم. او منه کتاب وئریب و منی نبی ائدیب».

نه مانعی وار الله اؤز مطلقه گوج و حکمتی اینن بیر شخصی بعضی مصلحتلره گؤره نبی و یا امام ائله‌یه. نئجه کی قرآنین بویوردوغو اساسیندا الله تعالی عیسی و یحیی‌نی اوشاقلیقدا پیغمبرلیق مقامینا سئچیب. الله قرآندا یحیی (ع) باره‌ده بویورور: « یا یحیی خُذ الْکتابَ بِقُوَّةٍ و آتیناهُ الْحُکمَ صَبِیا؛ الله‌ین کتابینی قدرتله ساخلا. بیز پیغمبرلیق امرینی اونا اوشاقلیقدا وئردوق».

 امام رضا (ع) 35 یاشیندان اماملیق مقامینا چاتیر و 47 یاشینا قدر اولاد صاحبی اولمور. یعنی 12 ایل بویونجا دوشمنلر او حضرته بئله سؤزلر دئییردیلر: «پیغمبرین روایتینه گؤره شیعه اماملاری 12 نفردیلر کی 9-و حسین بن علی‌نین (ع) نسلیندندیر. بیز سنین اماملیغینی نئجه قبول ائدک بیر حالداکی اولادین یوخدور؟»

 حضرت جوادالائمه‌نین ولادتی آتاسی‌نین امامتینی ثابت ائدیب شیعه اعتقادی‌نین گوجلنمه‌سینه سبب اولدو. اونا گؤره او حضرت دونیایا گلنده امام رضا بویوردولار: «اوندان داها برکتلی مولود دونیایا گلمه‌ییب».