15 ایل بوندان قاباق دولتلی و کاسب اوشاغی بیر کلاسدا درس اوخوردولار چونکی او
زمانلار هله اوشاقلاری خانواده‌لری‌نین مادی
وضعیتینه گؤره بیر بیریندن آییران خصوصی مدرسه‌لر یوخ ایدی و هامی دولتی مدرسه‌لرده درس اوخوماغا مجبور ایدیلر.
او زمانلار اوشاقلارین الینده ساده میدادلار و تعاونی دفترلر اولوردو. آما بو
گونکی صحنه اینن او گونون وضعیتینه مقایسه ائله‌ینده چوخ شئیلرین دَییشدیگینی گؤرماق اولور.
تهرانین یوخاری محله‌لری‌نین
بیرینده بیر لوازم التحریر توکانیندا مختلف تحصیل «سِت»لری گؤزومون قاباغینا
دوزولوب. جور به جور میدادلار، خودکارلار و دفترلر بعضاً هر ستده 100 قلمدن آرتیق
وسایل ابتدائی و یوخاری سطحلر اوچون دوزولوب. ابتدایی سطحی‌نین ستلرین لاپ اوجوزلوسو بیر میلیون تومندن باشلاییر. هله
یوخاری سطحینه مربوط اولان ستلردن 8 میلیون تومنه ده وار. سوروشورام بونلاری آلان اولور؟ جواب آلیرام: نه
اینکی آلان اولور حتی بعضاً ابتدایی سطحینده‌کی اوشاغا یوخاری سطحلره مربوط اولان سِتلر آلینیر کی مثلاً
اوشاغین استعدادلاری داها آرتیق ترقی تاپسین. و حتی بعضاً موجود سِتلری بَینمیرلر
و اؤز سلیقه‌لری
اساسیندا سِتلر سفارش وئریرلر.
بو صحنه، آشاغی یوخاری جامعه‌میز هر یئرینده تکرارلانیر. خانواده‌لرین یئرینه یئتیریلیمه‌میش آرزیلاری و ایچلرینده قالان عقده‌لری، اوشاقلارینا داها لوکس وسایل آلماغینان ائشیگه چیخیر.
مدرسه‌لرده بو
جور وسایلدن استفاده ائله‌ماق اوشاقلارین آراسیندا پاخیللیق حسّینی گوجلندیریر و اونلاری سالم اجتماعی
محیطده یاشاماقدان محروم ائلر.
بعضی خانواده‌لر اورکلرینده قالان آرزیلارینی اوشاقلارین اوستونده اجرا
ائلیرلر یعنی اؤزلری محروم قالدیقلاری امکانلاری یادلارینا سالیب ایندی اوشاقلاری
او امکانلارین ایچینده بوغورلار کی ائله بو ایش‌ده همان منفی نتیجه‌نی حاصل ائلیر. بو مسأله اوشاقلاردا منفی روحی تأثیر قویماقدان علاوه جامعه‌ده اولان طبقاتی فاصله‌نی درینلشدیریر.
والدین طرفیندن فرقلی گؤرسدیلماغا چالیشیلان اوشاقلار، گله‌جاقدا خودبین و منفعت طلب انسانلارا تبدیل اولا بیلرلر.
چونکی اونلارا هامیدان فرقلی و یوخاریدا اولماق اؤرگیدیلیب. و نتیجه‌ده گله‌جاقداکی جامعه‌میزین
ناهنجارلیقلاری داها چوخ و آرتیق اولاجاق..