فال مسأله‌سینده بیرینجی مسأله شخصین گله‌جاقدان خبردار اولماق اولماق ایسته‌دیغی و اضطرابلاری‌نین آرادان گئتمه‌سیدیر.
فالچی‌یا گئن کیشی و یا خانیملاردان الده دقیق آمار یوخدور آما ائشیتدیقلارمیزا اساساً فالچی‌لارین اصلی مشتریلری خانیملار اولور. بونون علتی بو اولا بیلر کی کیشی حسّلر و عقیده‌لری ابراز ائله‌ماغا قورخورلار آما خانیملار بو زمینه‌ده داها راحتدیرلر. بونون علتی هر نه اولسا دا ایندی نتیجه بو اولوب.
انسانلارین فالچی‌یا باش وورمالارینا چوخلو عامل‌لر دخیل اولا بیلر آما اساس عامل ناامنلیق حسّیدیر. اولا بیلر بو ناامنلیق حسی خانواده واسطه‌سی اینن یارانا و یا آیری محیطلرین تأثیری آلتیندا یارانا و شخصی فالچی‌یا یولوخماغا تشویق ائله‌یه.
موفقیت هوسینی ایکینجی عامل کیمی سایماق اولار. انسانلار بو احتیاج اساسیندا گله‌جاقداکی موفقیتیلریند خبردار اولماق اوچون فالچی‌یا گئدیرلر. فالچی‌لارین‌دا اونلارین بو احتیاجلاریندان خبرلری وار و بولوم-سولوم اونلارین قاباقداکی موفقیتلریندن دانیشارلار.
البته بعضی‌لرینی‌ده تنهالیق حسی فالچی قاپیسینا هدایت ائلر.
آیری عامل‌لردن بیری‌ده پوکلوق و ضعیفلیق حسّیدیر. اؤزلرینی ضعیف گؤرن انسانلاری اؤز ایچ سیستملری و گوجلرینه دایانماق یئرینه ائشیک عامل‌لردن فایدالانماق ایستیرلر. بئله‌نچی شرایطده فالچیلیق و جادو مراجعه ائله‌ماغا لاپ ائده‌آل مرجع گؤروشر.
آیری طرفدن تئز اینانماق و عاغیل‌لاریندان دوزگون استفاده ائله‌مه‌ماق فالچیلاری تشویق ائلیر مشتری‌لرینی توولاماغا داها راحت اقدام ائله‌سینلر. بو وضعیتده اؤزلرینه اعتمادلاری اولمایان انسانلار یوخاری بیر قدرته متوسّل اولماغینان مشکل‌لرین حلّینیه چالیشیرلار. و بو ایشی او قدر قاباغا آپارارلار کی بوتون ایشلرینده حتی خیردا ایشلرینده بئله فالچی‌سیز اقدام ائلیه بیلمزلر.