روانشناسلاری اعتقادینا گؤره، سولاق‌کارلار بدنلری‌نین هر ایکی طرفیندن استفاده ائله‌ماغا داها باشاریقلیدیلار.
دنیانین بوتون آداملاری جور به جور فرقلر اینن متولد اولورلار آما لاپ جالب فرق دنیانین یوزده 10-ون سولاق‌کار اولماقلاریدیر.
سولاق‌کارلیغین سببی نه‌دیر؟
قدیملر سولاق‌کارلیق باره‌ده غلط ایناملار واریدی و خانواده‌لر اوشاقلارین سولاق‌کار اولماقلاری اینن مخالف اولاردیلار و جور به جور یوللارینان اونلاری سول ال اینن یازماغا مانع اولاردیلار. بو ایناملار شیطانین سول ال اینن ارتباطی و قیامت گونو پیس عمل‌لرین نامه‌سینی سول اله وئرماغینا باغلی اعتقادلاردیلار.
بو ایشلر یاواش یاواش آزالدی نییه کی خانواده‌لر بو ایشین باشی آشاغیلیق گتیره‌جاغی یوخ بلکه اوشاغین هوشلو اولدوغونا دایر علامت اولماسینی آنلادیلار. سولاق‌کارلار اؤز سئچیملری اولمادان فرقلی دنیادا یاشاییرلار، اونلار اونلاری سولاق‌کار ائله‌ین ژن اینن دنیایا گلیبلر. تحقیقلره گؤره، ژن‌لر و طبیعتین بوروشوق تعاملو نتیجه‌سینده بیر انسان سولاق‌کار اولور. آما ایندی‌یه کیمی‌ده «سولاق‌کارلیق» ژنی آدیندا بیر ژن‌ده تاپیلماییب.
روانشناسلارین دئدیغینا گؤره، سولاق‌کارلار بدنلری‌نین هر ایکی طرفیندن استفاده ائله‌ماغا داها باشاریقلیدیلار. آیری سؤزله اونلارین بئیینلری‌نین هر ایکی طرفی بیر بیرلری‌نین داها راحت ارتباط قورا بیلیر. آمریکانین روانشناسلیق مجله‌سینده یاییلان تحقیقه گؤره، سولاق‌کارلارین او بیری انسانلارا گؤره داها آرتیق خلاق اولدوقلاری اورتایا چیخیب.
هابئله سولاق‌کارلار مسأله حلینده داها یاخجی و داها آرتیق یول ارائه وئره بیلیرلر. والدینین ایکیسی‌ده سولاق‌کار اولسا اوشاقلارین یوزده 50-سی سولاق‌کار اولا بیلر آما والدینین هئچ بیری سولاق‌کار اولماسا اوشاقلارین یوزده 2-سی‌نین سولاق‌کار اولما احتمالی وار.
دنیانین مشهور سولاق‌کارلاری:
قدیملر سولاق‌کارلیغی عیب بیلسه‌ایدلر ده یاواش یاواش بو اعتقاد دَییشدی. دنیادا سولاق‌کارلارین چوخ شهرته چاتدیلار کی آشاغیدا اونلارین بیر نئچه‌سینی آد آپاریروق:
لئوناردو داوینچی، ناپلئون، ماهاتما گاندی، IBM شرکتین مدیری، جولیا رابرتز، جان اف کندی، جیم کری، دده جورج بوش، باراک اوباما، بوروس ویلیس، آنجلینا جولی، بیل گیتس، انیشتین، چارلی چاپلین، ارسطو، افلاطون، بتهون، فریدریش نیچه، ماری کوری، استیو مک کوئین، نیکول کیدمن، اسحاق نیوتن، پیکاسو، ویلیام شکسپیر، آمیتاب باچان، دیگو مارادونا، تنیس اعجوبه‌سی مک انرو ، و حتی اؤلکه‌میزین رئیس جمهوری حسن روحانی.