استرالیانین
ملبورن شهرینده بیر ابتدایی مدرسه، تایسیز بیر حرکتده اوشاقلارین کؤکلمه‌سی‌نین
قاباغینی آلماق اوچون بیرینجی آیاق اوستو کلاسی تشکیل وئریب.
مونت آلبرت
دبستانی اوتورماغا و آیاق اوستونده دورماغا تنظیملنه بیلن میزلره تجهیز اولوب. بو
تایسیز اقدام، قلب و دیابت محقق‌لری‌نین تحقیقلری‌نین بیر قسمتی کیمی اولوب.
بو میزلر،
ایکی آی اوّل کلاسا گتیریلیب و اوشاقلارین چوخو بو فرصتدن آیاق اوستونده دورماق
اوچون استفاده ائله‌ییبلر.
آیاق اوستونده
دورماغی سئچن اوشاقلار عالملری تیمی طرفیندن گؤز آلتینا آلینیبلار. اونلار بونون
دالیسیجاندیلار کی بیلسینلر آیاق اوسته دورماق سلامتلیق، اندام تناسبی و حافظه‌ده
تأثیری وار یا یوخ.
هابئله
اوشاقلارین نه قدر آیاق اوستونده دوردوقلارینی و نه قدر اوتوردوقلارینی اؤلچماق
اوچون بیر سئری دستگاهلار دا قوشولوب.
اوّلکی
تحقیقلر گؤرسدیر کی اوشاقلار مدرسه‌ده‌کی وقتلری‌نین اوچده ایکیسینی اوتدوق یئرده
کئچیریرلر. بو دا اونلارین اورک-دامار ناخوشلوقلارینا مبتلا اولماقلارینا گتیریب
چیخارا بیلر.
اوشاقلار آیاق
اوستونده دوراندا داها چوخ عضله فعال اولوب قانین بدنه چاتماسی داها راحت اولوب
یورقونلوق آزالیر. اوشاقلارا دوزگون و ساغلام رفتارلاری اؤرگتماق باعث اولار
بؤیوینده ده همان رفتارلاری ادامه وئرسینلر.
مدرسه مدیری‌نین
دئدیگینه گؤره، ایندیه‌جن اوشاقلار،
والدین و معلملر بو ایشدن استقبال ائدیبلر.