گؤز بیر شئیی گؤرنده، اورک اونا طرف چکیلر و اورک بیر شئی ایسته‌یَنده اونا عمل ائله‌ماغا انگیزه یارانار. بونا گؤره تبلیغات انسانلارین رفتار طرزینه مستقیم تأثیر قویور.

تبلیغاتداکی جاذبه‌لر دایاز و حیوانی لذّتلر سطحینده اولسا انسانلارین یاشاییش طرزی‌ده او طرفه گئدر. آما بو جاذبه‌لر اخلاقی و معنوی اولسالار انسانلارین یاشاییش طرزی‌ده معنویّاتا طرف گئدر.

ایندیکی تبلیغات انسانلاری بیر حدّه گتیریب کی هر شئیی پولدا و دنیا مالیندا گؤرورلر و جوانلار چوخ راحت دئییرلر: پول اولماسا علمین نه فایداسی وار؟

بو تبلیغات انسانلار آراسیندا علمین و تحقیقین ارزیشینی آشاغی یئندیریب و مادّیّاتین ارزیشینی چوخالدیب. البته نظرده آلمالی‌ییق کی یوخسوللوق‌دا ارزش ساییلماز آما وار-دولتین معنویّاتسیز و اخلاقسیز ارزشی یوخدور.

ثروت یاخجی بیر شئیدیر. قرآندا دا اوندان گؤزل بیر شئی کیمی بحث اولونوب. آما بو او زماندیر کی ثروت معنویّات و اخلاق یولوندا خرجلنسین.