جامعه‌مزده طلاق معضلی لاپ بحرانلی ایللرینده‌دیر. اؤلکه‌میزین طلاق آماری منطقه‌نین لاپ یوخاری آمارلارین ایچینده‌ یئر آلیر. طلاق آماری‌نین لاپ مهم مؤلفه‌سی مشترک یاشاییشین مدتی ساییلیر. اؤلکه‌میزده بوشانانلارین یوزده 25-ی ایکی ایلدن آز مشترک یاشاییرلار. و مجموعدا واقع اولان بوشانمالارین یوزده 50-سی بئش ایلدن آز مشترک یاشاماقدان سونرا باش وئریر. بو جریان بعضی استانلاردا داها بحرانلیدیر.

جامعه مدیرلی نگران ائله‌ین آیری مسأله توافقی بوشانمالارین چوخالماسیدیر. بو مئتوددا ار-آرواد اؤز آرالاریندا حق وحقوقلاری باره‌ده توافق ائله‌ماغینان دادگاها مراجعه ائله‌ییب قیسسا مدت ایچینده بوشانا بیلیرلر.

آمار گؤرسدیر کی تهراندا باش وئرن ایلده 30 مین بوشانمانین 27 مین زوجی توافقی صورتده اولور یعنی بوشانمالارین یوزده دوخسانی توافقی اولور.

یو تأسفلی وضعیتین حلی اوچون قوه قضائیه، توافقی طلاقین چتینلتمه‌سی اوچون بیر ایشلر گؤرماق ایستیر. اونلاری بیر ایش گروهو تشکیل وئرماغینان بو ایشین یوللارینی آختاریرلار. او جمله‌دن بئله بیر طرح وئریبلر کی بوشانماق ایسته‌ینلر دادگاه شعبه‌لرینده ثبت اولمامیش مشاوره مرکزلرینه ارجاع اولسونلار و اوردا نتیجه‌یه چاتمایاندان سونرا دادگاها ارجاع وئریلسینلر.

بیر تحقیقده تهراندا باش وئرن توافقی بوشانمانین آروادلار و کیشیلر طرفیندن مطرح اولان دلیللر بونلاردیر:

آروادلارین دلیللری: ارین یامان دئمه‌سی و دؤیمه‌سی، قئیین –قودا دخالتی، ارین خیانتی، فرهنگی اختلاف نظر، حددن آرتیق یاش فرقی، مجبوری ائولنماق و قاباقجادان تانیماماق.

کیشیلرین دلیللری: آروادی سئومه‌ماق، آروادین اؤز باشینا ائشلری، اونا بدبین اولماق، تمکین ائله‌ماق، یولا گئتمه‌ماق، اخلاقی قیدالاری رعایت ائله‌ماق، تفاهمون یوخلوغو، آروادین یئرسیز توقعلاری، آروادین اره اینانماماسی و عاغیلسیز ایشلری.

البته بیلمک لازمدیر کی بو عنوانلار عریضه‌ده یازیلان سؤزلردیر و حقیقتدن فاصله‌لی اولا بیلر.

عایله مشاورلرین نظرینه گؤره توافقی بوشانمانین اصلی عامل‌لری بونلاردیر:

یولا گئتمه‌ماق، اردن متنفر اولماق، ار طرفیندن آروادین ایستکلری و توقع‌لارینا دقّت یئتیرمه‌ماق، ایکی طرفین عایله‌لری‌نین دخالتی، ارین تحمل ائله‌مه‌مه‌سی و کؤنزلیق.