ا
خانواده عضولری، بیر عایله‌نین عضولریندن چوخ ائو آدیندا دؤرد دیوار ایچینده یاشایان مختلف و بیگانه آداملار بنزه‌ییرلر. هر کسین باشی اؤزونه مشغولدور. بیری اؤز اؤزونه گولماقدادیر او بیری تئز تئز تایپ ائلیر. بو جور عایله‌لرده دانیشماق یاددان چیخمیش مفهوما چئوریلیب. ائله بیل دانیشماق واخت تلف ائله‌ماق معناسیندادیر و بیرینی دانیشدیراندا اونا مزاحم اولماق کیمی اولور.
بو جور خانواده‌لرین سایی آز دئییل. مختلف اجتماعی شبکه‌لرین مخصوصاً موبایلا دایانان اجتماعی شبکه‌لرین زندگانلیقلارا داخل اولماسی بو تیپده‌کی عایله‌لرین باشینی اؤزونه قاتیب. بعضی والدینلر اوشاقلارینی ائوین بیر بوجاغینا سیخیلیب سس‌سیز اجتماعی شبکه‌لرینن مشغول اولدوغونو گؤرنده اوشاقلارین باش آشاغا اوشاق اولدوغونو گمان ائدیب بو امکانی اونلارا یارادا بیلدیکلری اوچون اؤزلرینده غرور حسّ ائلیرلر. اونلارا گؤره اوشاقلار کوچه بازاردا ناباب دوستلارینان گزماق یئرینه اجتماعی شبکه‌لرده دولانسالار داها یاخشی اولار.
خانواده عضولری‌نین آراسیندا بو رابطه‌سیزلیق کرپیجلری خیردا خیردا هؤرولوب اوجا اوجا دیوارلار یارادیرلار کی اونلاری بیر داها ییخماق اولمایاجاق.
خانواده‌لرده اؤز محورلیغین آرتماسی
اجتماعی شبکه‌لر خانواده اعضاسی‌نین رابطه‌سی‌نین آزالماسینا سبب اولور و خانواده‌لرین چوخوندا مجازی شبکه‌لر عضولر آراسینداکی دانیشیغین یئرینی توتوب. خانواده‌نین اساس نقشلریندن بیری فردلری مستقل و عین حالدا خانواده‌نین اعضاسی‌نین ایستکلرینه دقّتلی، بارا گتیرماقدیر. آما مجازی شبکه‌لر خانواده‌لرین بو نقشینی آزالدیر و انسانلاری جمعدن آییریر و اؤز محور ائلیر. بو انسانلار فقط اؤز ایستکلرینه دقت ائلیرلر و آیریلارین نه‌یه احتیاجلاری‌نین اولدوغو اونلارا اهمیتی یوخدور.
خانواده عضولری‌نین بیربیرلرینه آییرماغا واخت اولمایاندا بیر بیرلرینی‌ده تانیماغا امکانلاری و علاقه‌لری اولمور و بئله‌لیغینان بیر دام آلتیندا یاشایان غریبه‌لر اولورلار.