شرقي آذربايجان بازرگاني سازماني نين خاريجي بازرگاني موعاويني اؤلكه نين فرش صاديراتي نين يوزده قيرخي اوستاندان اولماغا ايشاره ائديب دئدي:  اؤلكه نين فرش صاديراتي نين 40 درصدي شرقي آذربايجانداندير.

فارس خبرگوزاريسي نين شرقي آذربايجان بازرگاني سازماني نين عومومي روابيطيندن نقل ائتديگي  گوزاريشه گؤره ، غلامعلي راستي تبريزده ال ايشلري صاديراتي كونسرسيومونون آموزشي كارگاهيندا دئدي:ايندي اوستاندا توخونان فرشلر و طرحلر لاب ارزيشلي و ياخشي ال فرشلري عونوانيندا دونيا بازارلاريندا چوخلو موشتريلر اؤزونه جلب ائله ييب.

بازرگاني سازماني نين خاريجي بازرگاني موعاويني دئدي: شرقي آذربايجان تهراندان سونرا نفتدن سوواي صاديراتي نين لاب يوخاري سهميني اؤزونه ايختيصاص وئريب.

او ايدامه وئردي: اؤلكه نين نفتدن سوواي صاديراتي نين 10 درصدي شرقي آذربايجانين سهميدير كي صاديراتي كونسرسيوملارين تشكيل و گئنيشلنديرمگي اينن بو سهمين آرتيرماسينا چاليشيروق.

راستي بونو دئماعينان كي ال ايشلري نين توليد و صاديرات زمينه سينده مخصوصاً گؤندن توليد اولان ال‌ايشلرينده‌ده بو اوستان پيشرو اوستانلارداندير ايظهار ائله دي: اؤلكه نين بيرينجي خوصوصي گؤن شهركي ده 300 عضونن شرقي آذربايجاندا دوزليب كه اؤلكه نين گؤن صاديراتي نين يوزده 90-نين اؤزونه ايختيصاص وئريب.

شرقي آذربايجان بازرگاني سازماني نين خاريجي بازرگاني موعاويني بونو دئماغينان كي نفتدن سوواي صاديراتدا ال ايشلري صاديراتينا اهميت وئرماق حقيقتده اوستانين و اؤلكه نين تمدّون و فرهنگين صاديراتيدير، دئدي: ال ايشلرينده اولان فرهنگي غينا و بو توليداتين دونيا بازارلاريندا حاضير اولماسي، فرهنگي سفير كيمي اولوب ايسلامي – ايراني قيدمت و فرهنگيني دونيايا نيشان وئره بيلر. او اؤلكه نين فرش صاديراتي نين 40 درصدي نين اوستاندان اولماسينا ايشاره ائديب دئدي: ايندي اوستاندا توخونان فرشلر و طرحلر لاب ارزيشلي و ياخشي ال فرشلري عونوانيندا دونيا بازارلاريندا چوخلو موشتريلر اؤزونه جلب ائله ييب و ايران فرشي و آذربايجان منطقه سي نين طرحلري لاب چوخ ساتيلان و طرفداري اولان ال فرشلريندن ساييليرلار.

راستي دئدي: ال ايشلري توليدينده گرك بازار تاپما و موشتري سليقه لريني تانيماغا جيدّي توجّوه اولونا، نيه كي دونيا بازارلاري نين نياز و ايستكلري هر گون دگيشماقدادير و بيز گرك اؤزوموزو بو دگيشماغينان يول بير ائليياق.

او داخيلي بازارلاردا ساتيلا بيلمه‌ين كالالاري، نفتدن سوواي صاديراتي نين توسيعه سينه اؤلدوروجو سمّ كيمي بيليب تأكيد ائله دي: دونيا بازارلاريندا حاضير اولماغين بيرينجي شرطي ياخشي و آز قيمتلي جينسلرين توليديدير.

شرقي آذربايجان بازرگاني سازماني نين خاريجي بازرگاني موعاويني اؤز دانيشيغي نين آيري قيسمتينده جونوبي كوره يه حاكيم اولان ايقتيصادي تفكّورو، دونيانين بوتون جماعاتينا كئيفيِّتلي كالا توليد ائله ماغي بير ياخشي تفكّور بيليب و آرتيردي: گرك خاريجي بازارلارداكي موشتريلرين اعتيماد حيسلريني اله گتيراق تا بين‌الملل بازارلاردا كالالارين دواملي و قالارگي اولمالاريني تضمين ائداق و بو، توليد ائليه‌نلرين وظيفه سيدير.