مهرین اجتماعی صدمه‌لر موضوعسونداکی میزگردینده بو گونکی دنیادا مجازی فضایا دقت یئتیرماغا تأکید اولوندو.

مهرین وئردیغی خبره گؤره، اجتماعی صدمه‌لری قاباغین آلماق معظم رهبرلیق مقامی‌نین تأکیدلرینده یئر آلیر کی بو گون قاباقکیلارا گؤره داها جدی و داها خطرلی اولوب. اعتیاد، بوشانما، اخلاقی فساد، انتحار و . . جامعه صدمه‌لرین لاپ مهملری کیمی مطرحدیلر و جامعه اونلارینان ال به یاخادیر.

ماهواره‌ای شبکه‌لردن علاوه تلگرام و انستاگرام کیمی مجازی و اجتماعی فضالار، اجتماعی صدمه‌لره تازا پنجره‌لر آچیب کی یولو جامعه‌نین صدمه گؤرمه‌سینی ایسته‌ینلره هموار ائله‌ییب.

بو میزگرد شرقی آذربایجان اسلامی تبلیغاتین مدیر کلی حجت‌الاسلام سید شهاب‌الدین حسینی، اؤلکه اسلامی تبلیغات دینی تشکل‌لرین مدیر کلی رضا معممی مقدم، اجتماعی علملر محققی و دانشگاه اوستادی فتح‌الله‌زاده، استان اسلامی تبلیغاتی‌نین تحقیق واحدی‌نین مسئولو طاهری و شرقی آذربایجان استانداری‌سی اجتماعی علملر مطالعه‌لرین ارش ایش بیلنی خانم عباسی‌نین حضوری اینن اجتماعی صدمه‌لر و اونلارین نئجه قاباغینی آلماق موضوعسو اینن برگزار اولدو.

جناب حبیب طاهری بو میزگردده دئدی: آخرالزماندا تازا گناهلارین یارانماسی و اونلارینان مقابله الئه‌ماغین چتین اولماسی باره‌ده روایتلریمیز وار کی مجازی فضا گناهلارینی بو ردیفده سیرالاماق اولار. بیز اؤزوموزو جوانلارین یئرینه قویساق اولا بیلر بیزده اونلار کیمی بو صدمه‌لرین معرضینده اولاردیق.

جناب عباسی‌ده دئدی: جماعت هر تازا مسأله باره‌ده اطلاعات ییغمالیدیلار چونکی مشکل‌لرین چوخونون اساس قایناغی بیلمه‌مزلیقدیر. اجتماعی ایش بیلنلر مطالعه‌لرینی آپدیت ائله‌مه‌لیدلر و رسانه‌لر واسطه‌سی اینن جماعتی موجود صدمه‌لردن آگاه ائله‌مه‌لیدیلر.

نظره گلیر هامی ال اله وئرسه اجتماعی صدمه‌لرین قاباغینی آلا بیلروق و هابلئه خانواده‌لرین بو زمینه‌ده کی رولونو انکار ائله‌ماق اولماز. ایندی ائودار خانیملار اجتماعی شبکه‌لردن استفاده ائله‌ینلرین سیراسیندا یئرلشیرلر و اونلار آگاه اولسالار خانواده‌لره وارد اولان صدمه‌لرین مقداری آزالار.