کلام رابطه‌سی
انسانلارین گونده‌لیق
رابطه‌سی‌نین بیر بؤلومونو تشکیل وئریر. بو رابطه انسانلار آراسیندا
احساسلارین منتقل اولماسیندا چوخ مهم نقشی اولور.
بیر موضوع باره‌ده نئجه
دانیشماغیز، سیزین اجتماعی آگاهلیغیزین مقداری، نئجه دوشوندوغوز و آیدین اولدوغوز
باره‌ده
اطلاعات وئریر. مؤثر و مطلوب بیر دانیشیقدا مسأله‌لر و مشکل‌لر باره‌ده
دانیشماق اضطرابی آزالدار و انسانی یونگول‌لشدیرر. دانیشیق اولماسا یاشاییشین گؤزل‌لیغی آزالار. چونکی حسّلریمیزین چوخونو دانیشیق یولو اینن
انتقال وئریروق. بیر دانیشیغین هر ایکی طرفه ده مطلوب اولماسینی ایسته‌ساق، اوچ نکته‌نی رعایت ائتمه‌لی‌یوق: سوروشون، فعال قولاق آسین و اؤزوز باره‌ده بیر شئیلر دئین.
سوروشماق
ابتدایی تانیشلیق اوچون اوست اوسته ایکی جوره سؤال سوروشماق اولار. تشریفاتی
سؤال‌لار
مثلاً طرفین آدی نه‌دیر،
هارالیدیر و نه ایش گؤرر. بیر ده داها خاص معلوماتی هدف توتان سؤال‌لار کی مقابل طرفین احساسلاری و اینانجلارینی بیلماق اوچون
سوروشولار. مثلاً اوشاقلارینان باش باشا
وئرماق باره‌ده نظری
نه‌دیر. بوجور سؤال‌لار صمیمیتی آرتیرار و مقابل طرفین شخصیتینی تانیتدیرار.
جذاب بیر دانیشیغی رمزی ادبلی و مناسب صورتده کنجکاولیغیزا ادامه وئرماغیزدادیر. چونکی
هر سؤال شکل توتماقدا اولان صمیمیتی داها دا چوخالدار.
فعال قولاق آسماق
یاخجی مخاطب مقابل طرفین سؤزلرینه قولاق آسماغی باشارمالیدیر کی او سؤزلری‌نین قولاق آسیلدیغیندان مطمئن اولسون. قولاق آسان شخص اؤزونه
مخصوص عبارتلرینن عکس العمل نشان وئرر و دانیشانا دقت مرکزینده اولدوغونا اطمینان
وئرر. قولاق آسماق آغزی باغلی اولماق معناسیندا دئییل.
مقابل طرفین ؤزلرینه قولاق آسین، اونلاری یاددا ساخلایین و اونا مناسب عکس
العمل نشان وئرین. دوز قولاق آسماقدان عاجز اولان انسانلار مخاطبلرین الدن وئریب
تک قالارلار.
اؤزوز باره‌ده
دانیشماق
بیر دانیشیغین صمیمیته منجر اولماسینی ایسته‌سز حتماً اؤزوز باره‌ده بیر شئیلر دئمه‌لیسیز. عکس تقدیرده ائله بیل دیش چوپو اینن بیس‌بول اوینورسوز. لازم دئییل بوتون حسّیاتیزی اورتایا تؤکه‌سیز آما بیلین کی اؤزوز باره‌ده هر وئردیغیز اطلاعات تازا قورولان رابطه‌یه داد دوز قاتیر.
مخاطب اینن متناسب دانیشین
دانیشیقدا صرف اولان انرژی، دانیشیغین سرعتی و یا آلچاق و اوجا سسله دانیشماغی
مقابل طرف اینن متناسب ائله‌مه‌لیسیز.
دانیشقدا صرف اولان انرژی
بعضیلری سؤزلرینی دئماغا و مقابل طرفین سؤزلرینی ائشیتماغا فرصت آختارارلار.
بعضیلری چوخ دانیشارلار و دانیشماغا فرصت تاپاندا سئوینرلر. بیر عده ده آز
دانیشارلار. دانیشیقدا داها چوخ تأثیر قویماق ایسته‌سز اوّلده مقابل طرفین هانسی طیفدن اولدوغونو بیلمه‌لی و اونا مناسب دانیشیغا ادامه وئرمه‌لیسیز. بو، سیزین اؤزوز اولمادیغیز معناسیندا دئییل بلکه انعطافلی
اولدوغوز معناسیندا گلیر. بئله بیر شخصه اصطلاحدا اوشاغینان اوشاق بؤیوگونن بؤیوک
دئییلر.
دانیشیغین سرعتی
هر کسین بیر دانیشیق سرعتی وار. بعضیلری یئیین و بعضیلری یاواش دانیشارلار.
دانیشاندا مقابل طرفین حالتلرینه دقت یئتیرماق لازمدیر. چونکی انتظاریندا یاواش
دانیشساق اونو کسالت باسار و یئیین دانیشساق عصبی اولار. یاخجی اولار مخاطبیمیزین
سلیقه‌سینه
مناسب دانیشیق سرعتیمیزی تنظیم ائدک.
سسین آلچاق اوجالیغی
دانیشغین اساس بؤلوملریندن اونون اوجا و یا آلچاق سسله اولماسیدیر. حددن آرتیق
اوجا دانیشاندا اؤزوز اون طبیعی بیلیب اعتماد بنفسین یوکسک اولدوغونو بیله‌سیز آما مخاطبلریز اونو تکبّر معناسینا تفسیر ائلیه بیلرلر
و یا چوخ یاواش دانیشساز اؤزوز اونو تواضع علامتی حسابلیه بیلرسیز آما مخاطبلریز
سیز اعتماد بنفس‌سیز بیله
بیلرلر.
مقابل طرفینن هماهنگ اولماق
بو ایشین ساده یوللاریندان نوبه اینن دانیشماقدیر. بو ایش ساده نظره گلسه‌ده چوخلاری بون باشارا بیلمیرلر. مثلاً 10 دقیقه‌لیق دانیشیقدا یاخجی اولار بئش دقیقه‌سینی سیز و بئش دقیقه‌سینی مقابل طرف دانیشسین. تانیشلیغین اوّلینده دانیشیقلار
قیسا اولسا یاخجی اولار.