آغبولاق کؤهولو
آذرشهرین جنوبوندا یئرلهشن قدمگاه (بادامیار)
کندینین یاخینلیغیندادیر. اسلامدان قاباغا عایید اولابیلر. یئرآلتی فضاسینین کسیتی
(مقطع) داییره شکیللی و 15 مئتیر چاپی (قطر) وار.
9 مئتیرلیک بیر دالان کی انی 1.5 مئتیر و اوجالیغی
2.5 مئتیردیر بویو 4.5 مئتیر و انی 3.20 مئتیر و اوجالیغی 4-2.5 مئتیر اولان داها
گئنیش بیر دهلیزه باغلانیر. سونرا، بو دهلیز
کؤهولون گونبز شکیللی فضاسینا آچیلیر. بو فضانین، کفـیندن ایشیقلیق پنجرهسی و سقفـینه قدر 12 مئتیردیر.
ایسکندر کؤهولو
تبریزین 30 کیلومئتیرلییینده سعیدآباد کندیندهدیر.
تبریز-تهران ترانزیت جادهسییله اورایا گئتمک مومکوندور.کؤهولون آغزینین انی یاخلاشیق
5 مئتیردیر. ایچری دیوارلاریندا جالیب سارقیتلار (استلاکتیت) واردیر.
دوگیجان کؤهولو
سارقیتلی کؤهوللردندیر. مرندین شرقینده و ماشین
یئلئیلا اورایا چاتماق اولار. آغزی 3.5 مئتیردیر.
هامپوول/گؤیرچین کؤهولو
محلی آدی هامپوول (هامپوئیل) اولان گؤیرچین
کؤهولو مراغانین جنوبشرق 15 کیلومئتیرلییینده یئرلهشیر. بو کؤهول،
بیر قایا داغین کمرینده و جنوبا ساریدیر. موردو چایین یاتاغیندان 1600
کیلومئتیر اوجادادیر.
آغزی 8 مئتیر و اوجالیغی 40-25 کیلومئترهدیر. ایلک مئیدانینین ان- بویو 40×60 مئتیردیر. کؤهولون گیریشینده میلادی
1925 تاریخلی روسجا بیر کتیبه واردیر.
گؤیرچین کؤهولونون اهمیتی، درین قورخونج قویولارینا
گؤرهدیر کی داش تندیرلر و بؤیوک دالانلار شکلیده گؤرونور. بو کؤهول، منطقهیه گلن کؤهولبیلیمچیلر (غارشناس)، محققلر و داغچیلار طرفیندن دیگر کؤهوللردن چوخ، جالیب گورولور.
ایچری گیرندن سونرا، سقفـینده ایکی باجاسی
اولان گئنیش بیر یئره گیریریک. ایلک مئیدانین شمالشرق انتهاسینداکی دار دالان ایکینجی
مئیدانین گیریش یولودور. ایکینجی مئیداندا دؤرد یول وار: ایکیسی اول مئیدانا، بیریسی
کؤهولون ایچینه، بیریسی ده کؤهولون جنوبشرقیندهکی بیر یئره آچیلیر.
ایکینجی مئیدانین شمال و شمالشرق طرفینده، دؤرد
درین قویو واردیر. هر ایل کؤهولده چوخ دهییشیکلیکلر باش وئریر. ایلک و ایکینجی مئیدانلارین
دهییشیکلیکلری یئربیلیم (زمین شناسی) باخیمیندان کۆلون تاپیلماسیدیر کی بعضاً
توپوق بعضاً ده دیزه قدر چاتار. کؤهولون مختلف قویولاریندا ایکی سو سۆفرهسی واردیر کی بیریسی شوملاییب کورلانیبدیر آما او بیریسینده هله سو
واردیر و سسی گلر. قویولارین و دیوارلارین طرفلرینده و ایکینجی مئیدانین سقفـینده
آهک چؤکللری (رسوبات) و سارقیتلار (استالاکتیت) گؤزل و جالیب منظرهلر وجودا گتیریبدیر.
کؤهولون هاواسی چوخ یاخشیدیر فقط آخیردا، خصوصاً اوچونجو و دؤردونجو قویولارین
کناریندا یئترینجه هاوا یوخدور و ، ایپ، نورافکن، ایمنی وساییل، هاوا کپسولو و
راهنماسیز اولارق اورایا گئتمک مومکون دئییلدیر..
فرهنگی میراثلار ادارهسی