بوتون قرارلار
قویولوب و رابطه‌نین رسمیلشیب نشانلی‌لیغین اعلامینا آز قالیر. آما نه اولور کی بیردن بیره کؤره‌کن قارداش «ائلنمگه هله حاضر اولمادیغینی» اعلام ائلیر. بو
صحنه‌یه چوخ راستلاشماساق‌دا هر دن بئله صحنه‌لره شاهد اولوروق.
اوغلانین دالی
قاییتماسی‌نین سببی نه اولا بیلر؟
مینلر سببین ایچینده آشاغیداکی سببلر داها چوخ شایع اولانلاردیلار. اولا بیلر بو
سببلر خانیملارین نظرینه قانع ائله‌ین
سبب اولمایا آما بونو دا نظرده آلمالی‌یوق
کی خانیملارین و آغالارین باخیش زاویه‌لری
فرقلیدیر.
مسئولیتدن
قورخو:
بعضاً اوغلان
هر شئیی ساده و عاشقانه گؤرور آما رابطه رسمیلشیب جدّی ایستکلر مطرح اولاندا، اوغلان اؤزونو
اجتماعی و مالی لحاظدان چتین شرایطده گؤرونجه، مشترک زندگانلیغا هله حاضر
اولمادیغینی دوشونور. تکلیق و گوجسوزلوق حسّی بیر کیشینی عاطفی رابطه‌سیندن قاچیردان
لاپ بؤیوک عاملدیر. بئله وضعیتلرده خانواده و مقابل طرف اونا اورک وئریب دایما
کناریندا اولدوقلارینی اونا حسّ ائله‌تدیرمه‌لیدیلر. آما بو
حمایت اینن بئله یئنه‌ده قاچماق ایسته‌سه بو اونون روحی جهتدن ائولنماغا
هله حاضر اولمادیغی‌نین علامتیدیر.
مجبوری
ائولنماق:
بعضاً اوغلان
خانواده‌نین فشاری آلتیندا ائولنَر
و یا اونلار ایسته‌ین قیزینان ائولنماغا مجبور
قالار. بئله‌نچی وضعیتده ایشین هر
ایئرینده اوغلانین پئشمان اولوب دالی اوتورماق احتمالی وار. بو وضعیتده اوغلان
خانواده‌سی‌نین فشارینی آزالتماق اوچون اوّلده ائولنماغا راضی اولار
آما هر آن پئشمان اولماق احتمالی یوخاریدیر. بئله‌نچی ائولنماقلار باش توتسا بئله دوام گتیرماق احتمالی آز
اولار.
قیزین آرتیق
تاماحلیغی:
قیزلارین
یئرینه گتیریلمه‌میش چوخلو آرزیلاری وار.
بعضی قیزلار بو آرزیلارین ائولنماغینان یئرینه گتیریلمه‌سینی ایستیرلر و بئله بیلیرلر کی ائولندیقلاری کیشی‌نین اونلاری آرزیلارینا چاتدیرماق گوجلری و وظیفه‌لری وار.
قیزلار بو
انتظارینان اوغلانا یاخینلاشاندا، ایستر ایسته‌مز اوغلان اؤزونو حددن آرتیق فشاردا حسّ ائدیب قاچماغا
اقدام ائلیه‌جاق.
واقعیتلرین
اوزه چیخماسی:
هر رابطه‌نین قیریلماسی‌نین
بیرینجی سببی صداقتسیزلیقدیر. آما انسانلارین چوخو، کیچیک یالانلارین بؤیوک
خیانتلر کیمی رابطه‌نین قیریلماسینا باعث اولا
بیله‌جاغینی آنلامیرلار. یالان،
کیچیک‌ده اولسا، صداقسیزلیق
علامتیدیر. هله قالسین کی بو یالان تانیشلیغین اوّلینده دئییلمیش اولا.
مسموم
رفتارلار:
خانیملارین
چوخو، تانیشلیق پروسه‌سی‌نین نورمال گئتمه‌لی اولدوغونو بیلمیرلر. اونلار بئله بیلیرلر کی نیشانلی‌لارینی بیر آن بئله تک بوراخمامالیدیلار. بیر حالدا کی
کیشیلرین دوره‌ای صورتده خلوته احتیاجلاری
وار. بو گئدیشه خلل یئتیشسه اوغلان ائولنماقدان واز گئچه بیلر.
مقابل طرفی
درک ائله‌مه‌ماق:
خانیم و
آغانین انتظارلاری و باخیش زاویه‌لری فرقلی اولا بیلر. اوست
اوسته هر ایکی انسان دنیایا ایکی مختلف زاویه‌دن باخیرلار و اولویّتلری بیر-بیرلری اینن فرقلی اولا
بیلر. بونا گؤره مقابل طرفی درک ائله‌ماق
و اونون ایستکلرینه اهمیت وئرماق و هئچ اولماسا اونو آنلاماغی حسّ ائتدیرماق بو
زمینه‌ده اهمیتلی رول اویناییر.
کیشی‌نین ایستکلری خانیم طرفیندن
هئچه ساییلماسی نتیجه‌سینده او انتخابی‌نین سهو اولدوغونا اینانا بیلر.