اؤلکه‌میزده بیرینجی آماری 1275 هجری قمری ایلینده ناصرالدین شاه
زمانی و میرزا آقاخان نوری‌نین صدر اعظملیق دؤره‌سینده اولدو. او
آماردا، تهران شهری‌نین ائولری و ساختمانلاری ساییلمیشدی.
دئیه‌سن همان ایل، وزارت طرفیندن جمعیتین سایی و اقتصادی وضعی
باره‌ده آمار
توتماق و جمعیت ساییسی، مسکن و جماعیتن گلیر میزانی‌نین بللی اولماسی
اوچون، ایالتلرین حاکملرینه ده دستورالعمل وئریلمیشدی آما فنی مشکل‌لره گؤره بو
دستور اجرا اولونمادی. نهایتده میرزه عبدالغفار نجم‌الدوله، تهرانین
جمعیتینی تازا مئتودلارینان، تهران شهرینی بئش یئره بؤلماغینان 55 گونون عرضینده
ساییلدی و «دارالخلافه‌نین نفوس تشخیصی» آدیندا رساله‌ده منتشر اولدو.
بو آمار توتمادا، تهران شهری بئش محله‌یه بؤلوندو: ارگ، عودلاجان، چال‌میدان،
سنگلج و بازار. شهرین ائشیگینده‌کی محله‌لره ده بیر طبقه‌ده یئر وئریلمیشدی. بو آمارا اساساً
تهران جمعیتی 1286 هجری قمری ایلینده 155736 نفردن چوخ ایدی. بو سایی‌نین 147256 نفر
غیر نظامی و 8480 نفر نظامی ایدیلر. بو آمارا اساساً شهر جمعیتی‌نین یوزده 27-سی
اون بئش یاشدان کئچیک ایدی.
تهران جمعیتی‌نین ایکیمینجی ساییلماسی، 1301 هجری قمری ایلینده اولدو. بو
ساییلمادا دا تهران شهری همان بئش یئره بؤلونموشدو. مظفرالدین شاهین دؤردومونجو
سلطنت ایلینده یعنی 1317-ده ده تهران بنالاری‌نین آماری
توتولدو. بو آمار درویش حسن اخضر علیشاهین واسطه‌سی اینن انجام
تاپدی.
1336 هجری قمری ایلینده، دوغوم، اؤلوم، ائولنمه و بوشانمالارین ثبتی اوچون ثبت
احوال اداره‌سی تأسیس اولدو.