انسانین لاپ خوشبخت یاشی هانسی یاشدیر؟ بو سؤالا جواب وئرماق اوچون خوشبختلیغین تعریفینی بیلماق لازمدیر. روانشناسلار خوشبختلیغا اوچ فاکتور تانییرلار: بیرینجی عامل انسانین سالم اولماسی و هر جور ناخوشلوقدان کنار اولماسیدیر. ایکینجی عامل اجتماعی رفاهین اولماسیدیر. اجتماعی رفاه اؤزو اینن شادلیق و سئوینج گتیرر. اوچونجو عامل یاشاییشا اومود و اشتیاقین اولماسیدیر.

روانشناسلارین نظرینه گؤره، انسانین سلامتلیغی و عمرونون اوزونلوغو، شادلیق و خوشبختلیق حسّی اینن کیپ- کیپه باغلیدیر. چونکی روحون طراوتی و شادلیغی بدنین سالملیغی اینن مستقیم رابطه‌لیدیر. مثلاً زندگانلیقلاری اومود اینن دولو اولان قوجالار، اومودسوز یاشایان قوجالاردان ایکی ایل آرتیق یاشاییرلار.

خوشبختلیق، انسانین رفاهدا، شاد و زندگانلیغا اومودلو اولدوغو زمانا دئییلیر. روانشناسلارین دئدیغینا گؤره خوشبختلیق انسان عمرونون اوچونجو اون ایلیندن باشلایار. آما بو یاش مختلف اؤلکه‌لرده فرقلی امکانلارا گؤره متفاوت اولور.

مختلف مطالعه‌لر انسانلارین 40 یاشدان سونرا خوشبختلیغی حسّ ائله‌دیقلارینی گؤرسدیر. چونکی بو یاشدان سونرا رفتارلار عقل اوزو اینن اولور و قاباغا گئتماق مسیرینی راحت ائله‌ین چوخلو تجربه‌لر و دوستلار اله گلمیش اولور. انسانین 40 یاشدان سونرا عمرونون اوزو آشاغی گئتدیگینه رغماً اجتماعی رفاه، گونده‌لیق فعالیتلرین آزالماسی اونون خاطر جمع اولماسینا و خوشبختلیق حسّینه کؤمک ائلیه‌ بیلر. بو یاشداکی انسانلار گله‌جاق اوچون اضافه استرسه دوشمزلر و زندگانلیقدان داها آرتیق لذّت آپارارلار.