شرقی آذربایجان اسلامی ارشاد عمومی رابطه‌لری‌نین وئردیغی خبره گؤره، آبانین 26-دا تبریزین مرکزی کتابخاناسی‌نین اوستاد نخجوانی سالونوندا بیر مراسم ضمنینده کتاب خادملریندن تجلیل اولدو. بو مراسمده ولی فقیه‌ین شرقی آذربایجانداکی نماینده‌سی آیت الله مجتهد شبستری دئدی: بیز کتاب اوخوماق فرهنگینی داها آرتیق رواج وئرمه‌لی‌یوق چونکی غیر مسلمانلار مطالعه اثرینده بیز مسلمانلاردان قاباغا گئچیبلر و بیز علمی و فرهنگی لحاظدان دالی قالمیشیق.

او آرتیردی: خیّرلر کتابخانا دوزلتماقدان چکینمه‌سینلر و بو مسأله‌یه داها آرتیق دقت یئتیرسینلر کی عمومی کتابخانالارین سایی چوخالدیقجان کتاب اوخویان‌دا چوخالار.

ولی فقیهین شرقی آذربایجانداکی نماینده‌سی آرتیردی: بیز کتاب یازانلار و مترجملردن و کتاب خادملریندن حمایت ائله‌مه‌لی‌یوق کی جامعه‌ده کتاب اوخوماق چوخالسین.

بو مراسمده کتاب خادملری او جمله‌دن "صمد رحمانی خیاوی" دن بؤیوکلر سطحینده لاپ یاخجی مؤلف کیمی، فرحناز رسولی" دن اوشاقلار اوچون لاپ یاخجی مؤلف ک یمی، "یعقوب کامرانی" دن کتاب ساحه‌سینده فعال خبرنگار کیمی، "ملیحه حسین زاده" کتاب ساحه‌سینده فعال کارشناس کیمی و "حجت الاسلام و المسلمین صمد کامران قراملکی" دن لاپ یاخجی مترجم کیمی تجلیل اولدو.