بیر زندگانلیغین بوشانما حدّینه چاتماسی اوچون بیر سئری نشانه‌لر وار. بیز بو نشانه‌لرین لاپ گؤزه گلیملرینی بیر یئره ییغمیشیق:
بیرمینجی نشانه: خشن و تند بحثلرین باشلاماسی
بوشانمانین بیرینجی علامتی و نشانه‌سی بحثلرین خشونتلی باشلاماسیدیر. چونکی بحثلرین یوزده دوخسان آلتیسیندا سؤزون باشلاماسی نئجه اولسا آخری‌ده اوجور اولور. زوجلارین بیری بحثی مقابل طرفی متهم ائله‌ماق کیمی خشونتلی و تهاجمی باشلاسا او دانیشیغین آخری موفقیتسیز اولار.
آیری طرفدن، زوجلارین بیری بحثی آرام و یوموشاق باشلایاندا او دانیشیغین مثبت نتیجه‌یه چاتماسی‌نین احتمالی چوخدور.
ایکیمینجی علامت: منفی حالتلر
بحثه خشن باشلاماق زوجلاری منفی تعامله چکه بیلر و بو منفی تعامل مشترک زندگانلیغی سقوطا چکه بیلر. عموماً مشترک یاشاییشی داغیدان دؤرد جوره منفی تعامل وار: اشکال چیخارتماق، انتقادانه گؤزله باخماق، تحقیر ائله‌ماق و تدافعی حالت توتماق.
اشکال چیخارتماق: بیرمینجی خطرلی عامل مقابل طرفه اشکال چیخارتماقدیر. زوجلار بیر- بیرلری‌نین بعضی عمللرینی بَیَنمه‌یه بیلرلر آما مقابل طرفین شخصیتینه حمله ائله‌ماق آیری بیر شئیدیر.
اونلاری بیر- بیرلرینی دئیه بیلرلر کی سنین فلان گؤردوغون ایشدن منیم خوشوم گلمه‌دی آما اگر بئله دئسه‌لر : «سن اؤز رفتاریوی باشارمیسان و سنی تحمل ائله‌ماق چتیندیر» اوندادیر کی خطر علامتلری باشلامیش اولور. بو مرحله‌ده زوجلار بیر-بیرلرینی مسخره ائله‌ماغا، تحقیر ائله‌ماغا و بیر- بیرلری‌نین اوستونه چیغیرماغا باشلیرلار. بونلارین ایچینده تحقیر ائله‌ماق لاپ منفی علامت ساییلیر چونکی مقابل طرفده نفرت و غضب یارادیر و یولو مسأله‌نین حلینه باغلاییر.
تدافعی حالت توتماق: بو حالت معمولاً اهانت و تحقیر مقابلینده وجودا گلر. چوخلاری اونلاردان انتقاد اولان زمان بو حالتی اؤزلرینه توتارلار آما بو رفتار مسأله‌نین حلّینه اصلاً کؤمک ائله‌مز.
تدافعی حالت حقیقتده مقابل طرفی گناهلاندیرماقدیر و بو پیامی وئریر: «بو منیم مشکلیم دئییل و سنین اؤز مشکلوندور».
فکر وئرمه‌ماق: بو مرحله‌ده زوجلار بیر- بیرلرینه فکر وئرمیرلر و یوخدی حسابینا قویورلار. بو عمل مقابل طرفی داها دا آرتیق غضبلندیرر.
اوچومونجو نشانه: طغیان ائله‌ماق
زندگانلیغین بوشانماغا طرف گئتمه‌سی‌نین اوچومونجو علامتی زوجلارین بیری‌نین طغیان ائله‌مه‌سیدیر. بو دا بو معنایادیر کی یوخاریدا سایدیغیمیز منفی حالتلر بیر آن ایچینده و شدّتلی بروز ائله‌یه و مقابل طرفه شوک وئره.
بعضیلری طغیاندان چکینماق اوچون اؤزلرینی لاقیدلیغا وورارلار کی بونون‌دا نتیجه‌سی عاطفی رابطه‌نین قیریلماسی و نهایتده طلاقا منجر اولار.
دؤردومونجو علامت: بدن دیلی
طغیانینان عینی زماندا باش وئرن اورک چیرپینماسی، آدرنالین ترشّح تاپماسی و قان فشاری‌نین یوخاری گئتمه‌سی کیمی بدنین فیزیولوژیک تغییراتی، بوشانماغا گئدن یولون علامتلریندن ساییلیر.
بدنین بو تغییراتی بحثین ادامه‌سینه امکان وئرمز، منطقی ایشدن سالار و شرایطی داها دا چتینلشدیریب عاغیلسیز حرکتلره باعث اولار.
بئشمینجی علامت: موفقیّتسیز اصلاح چالیشمالاری
وضعیتین قاریشدیغی نقطه‌ده زوجلارین بیری مشکلون اصلاحینا چالیشر و مثلاً بیر عذر ایسته‌ماغینان و یا گولومسه‌ماغینان جریانی یوموشالتماغا چالیشار آما طغیان ائله‌میش بیری‌نین قاباغیندا بئله عمل‌لرین داها فایداسی اولماز.
آلتیمینجی علامت: آجی خاطره‌لر
بوشانمانین آخر علامتی، زوجلارین مشترک یاشاییشلاری‌نین فقط آجی خاطره‌لرینی یادلارینا سالماقلاریدیر. زوجلاری دالیدا قویموش خاطره‌لرینی مرور ائله‌دیقلاری زمان شیرین خاطره‌لر یوخ بلکه آجی خاطره‌لر گؤزلری‌نین قاباغیندا جانلانسا بو بیر- بیرلریندن خوشلری گلمه‌ماقلاری علامتی ساییلیر.