بیر مدّت اولار عزادارلیقلاری بدعتلردن تمیزله‌ماق بحثی مختلف محفل‌لرده گئدیر. هر ایل محرملیق آیی چاتماغینان عینی زماندا بعضیلری مختلف انگیزه‌لرینن تازا- تازا بدعتلر محرملیق مراسملرینه آرتیریرلار: باش یارماق، زنجیرله بدنلری پاره- پاره ائله‌ماق، شیپور چالماق، طبیل چالماق، خیابانلاری باغلاماق، لوت سینه وورماق و چوخلو عجیب غریب ایشلر.
اسلام دینی، انسانین مالینا و جانینا او قدر اهمیت وئریر کی هر شرایطده واجب اولان و هئچ واخت واجبلیغی آرادان گئتمه‌ین و اسلامین دیرَگی و ستونو ساییلان نمازی، انسانین مال و جانی خطره دوشن زمان سیندیرب قطع ائله‌ماق اولار. ایندی گؤره‌سن عزادارلیقدان اؤترو انسانلارین یولونو باغلاماق، اونلارین دیوارلاری دیبینده طبیل وورماق و آسایشلرینی اللریندن آلماق و بعضاً ناخوشلارینی اوجا سس اینن اؤلوم حدّینه قدر شکنجه وئرماغی نئجه تفسیر ائله‌ماق اولار؟
بو ایلدن‌ده جوربه‌جور بنر، بیلبورد، عکس و ... بو بدعتلره اضافه‌لشیب اوارجن کی حقیق عزادارلار داها بو جمعلره قوشولماغا و اونلارینان چیگین چیگینه عزادارلیق ائله‌ماغا اورک ائلیه بیلمیرلر. عزادارلیق مراسملری‌نین اعلانلاری دینی مراسمینه یوخ بلکه داها چوخ انتخابات تبلیغاتینا بنزیر.
بونلار بیر طرفه، کربلا واقعه‌سی‌نین شرحینده عاشورا قیامی‌نین فلسفه‌سی و مقصدی‌نین شرحی یئرینه کربلاده اولانلارین قیافه‌لرینی وصف ائتمگه باشلاییرلار.–کی هئچ کس گؤرمه‌ییب و اعتبارلی سندلر ده بو زمینه‌ده یوخدور-. هئچ کس اونلارین گؤرکملری‌نین یاراشیقلی اولدوغونو دانمیر آما مسأله‌یه بئله سطحی باخماق و قاش- گؤز حدّینه یئندیرماق عاشورا مقصدی‌نین ترسینه اقدام ائله‌ماق ساییلیر.
بو جور اقداملار و مسأله‌لر ضررلی زهر کیمیدیلر کی اونلارین قاباغی آلینماسا قیسا بیر زمان ایچینده محرملیق عزادارلیقلاری‌نین مسیری تماماً دَییشَر و آیری بیر شئیه تبدیل اولار.