قونشولار داها بیر- بیرلرینه آرخا دئییل‌لر و بیر – بیرلریندن خبرسیزدیلر. بو آجی واقعیّت نئچه ایلدیر کی کلانشهرلرده داها چوخ گؤزه دَییر. بیر مدت بوندان اوّل قونشو قونشودان خبرسیز اولمازدی. او زمان اونلار اختلافلاری‌نین نهایتی ماشین پارک یئری و بو کیمی مسأله‌لریدی.
آما بویون روزنامه‌لرین حادثه صفحه‌لرینده دالبادال اوخوروق کی بیری اؤلوب و قونشولار ساختمانی تعفن ایی بورویندن سونرا اونون اؤلوموندن و ائوده قالیب اییلندیگیندن خبردار اولورلار. ایندیکی وضعیتین بوندان علاوه اوغورلولار و خلافکارلارین بو شرایطدن سوء استفاده ائله‌ماقلاری کیمی آیری منفی تبعاتی‌ده وار.
شهرلریمیزده آزیندان اون اون بئش قونشونون بیر دیوار فاصله‌سی اینن یاشادیقلاری حالدا نظره گلیر قونشولار لازمی قدر بیر بیرلری‌نین حقلرینه واقف دئییل‌لر و بعضاً ایستر ایسته‌مز بیر - بیرلری‌نین اذیّت ائله‌مه‌سینه سبب اولورلار.
آپارتومان قاپیسی‌نین آچیق قالماسینا قیدسیز اولماق بو دقّتسیزلیغین لاپ آشاغی سویّه‌سیدیر کی چوخلو آجی حادثه‌لره گئدیب چیخیب.
حقیقتده چوخلاری یاددان چیخاردیبلار کی قونشولارین حقّینده بیر بالاجا دقّتسیزلیق اونلارا چوخ بؤیوک صدمه‌لر وورا بیلر.
ماشینین ضد سرقت سیستمینی فعال ائله‌ییب ماشینیندان اونون سسینی ائشیتمه‌سی ممکن اولمایان قدر اوزاقلاشان انسانلار آز دئییل‌لر بو جور واختلار ماشینین ضد سرقت آژیری‌نین سسی قونشولارین روحلارینا قوورا چکماقدان سونرا آیری ایشه یاراماز.
مسأله بوردادیر کی بو جور انسانلار قونشولارینا بیر بالاجا احترام قایل اولسالار اونلاری سس آلوده‌لیغی و اضطرابینان اذیّت ائله‌مزلر.