تبریز کلانشهری‌نین مینیاتور پارکی بو ایلین فجر دهه‌سینده افتتاح اولمالی ایدی آما بیر سئری مشکل‌لره گؤره بو مسأله گلن ایلین اوّل‌لرینه ساخلاندی.
اوچ ایل بوندان اوّل تبریز شهرداریسی، اؤلکه‌نین بیرینجی مینیاتور پارک طرحینی تبریز شهرینده اجرا ائله‌ماغا باشلادی.
بو پروژهنین بیرینجی مرحله‌سی اوچ آی تحقیق و آلتی آی گؤزله‌ماقدان سونرا، نهایتده 90-جی ایلین تیرینده، شهرداری بناسی، مقبرة الشعراء، ائل گؤلی، خلعت پوشان بناسی و علیشاه ارکی کیمی 5 تاریخی اثرینن ایشه باشلادی. آما بو پارکین فقط 5 اثرینن آچیلماسی چوخلی انتقادلارینان اوز به اوز اولدو.
تبریزین مینیاتور پارکی‌نین 2 ایل افتتاحیندان سونرا، بو ایلین شهریورینده ایکی یانقین بُرجی و مقدّس مریم کلیساسی اثرلری‌ده اونون مجموعه‌سینه اضافه‌لندی. بو دفعه‌ده اوستاد شهریار بلواریندا یئرلشن بو پارکدان دوزگون موغایات اولماماغا گؤره شهرداری‌یه انتقادلار باشلادی.
تبریز شهرداریسی‌نین مسئول‌لاری اخیر آیلاردا بو پروژهنین بو ایلین فجر دهه‌سینده نئچه آیری اثرینن تکمیل‌لشمه‌سیندن خبر وئرمیشدیلر آما بیر سئری مسأله‌لره گؤره بو ایش باش توتمادی.
تبریز شهرداریسی‌نین گؤزل‌لشدیرمه سازمانی‌نین مدیر عاملی بو باره‌ده دئدی: متأسفانه بو اثرلری دوزلدن تیم اونلاری وقتینده دوزلده بیلمه‌دیلر کی اومیدیمیز وار بو ایلین آخرینه‌جن قورتولسون. هابئله پارکین پیمانکاری قراردی بو ایلین آخرینده پارکی تحویل وئرسین.
او آرتیردی: ایندیلیقدا بو پارکدا یئددی اثر وار کی قراردی بو ایلین آخرینه‌جن گؤی مسجد و استانداری قصری کیمی بئشآیری اثر ده نصب اولسون. هابئله او بیری 18 اثر ده گلن ایل نصب اولاجاق.
تهرانین مینیاتور پارکی تبریزدن ایکی ایل سونرا 92-جی ایلده ایشه باشلاییب 12 اثرینن یونسکو فهرستینده ثبت اولدو. بو اثرلر واقعی سایزین ایرمی بئشدن بیری اندازه‌سینده‌دیلر کی تبریز بازاری‌دا اونلارین ایچینده وار.