چوخ تئز پرت اولوروق. بو سؤزون دوزلوغونو ثابت ائله‌ماغا شهر خیابانلاریندا نئچه ساعت گزماغیمیز کفایت ائلر. اطرافیمیزدا صبرلی انسانلار اولسا دا، غضبلنماق و پرت اولماق جماعتیمیز اساس رفتارینا چئوریلیب. یامان دئماقدان توتدو کؤتک وورماق و سیگنال چالماق. حتی بیز سیگنالینان دا یامام دئماغی باشاریروق. حتی بعضاً ایش چتین یئرلره چاتیب گؤزلرین قاباغینی قان آلیر و ووروشماق مرحله‌سینه قدم قویور. ماشین سورنده بعضاً بیر‌نین بیزدن سبقت آلماسینا دؤزوموموز اولمور. بو زمان عوضینه آشمادان ال چکن گونوموز اولمور. فرویدون نظرینه، پرت اولماق انسانین ذاتیندا وار. بعضیلری‌ده اونون منبعینی جامعه بیلیرلر چونکی اونون منبعینی انسانین ذاتی بیلساق، یئییب ایچماق کیمی طبیعی بیر احتیاج کیمی تلقّی اولار.
آمارا اساساً، دنیا سطحینده آمریکا لاپ خشن اؤلکه سایلیر و بو اؤلکه‌ده قتل، تجاوز و سلاحدان استفاده ائله‌ماق سایی چوخ یوخاریدیر. روانشناسلارین نظرینه گؤره، آمریکادا هالیوود فیلملری یولو اینن خشونت، تشویق و تبلیغ اولونور. دئیه‌سن خشونت آمریکا فیلملرینه تقدّس وئریر. آما بیزیم جامعه‌میزده بو تشویق او قدر ده گوجلو دئییل. بیزیم جامعه‌ده‌کی خشونتین اساس عاملینی جامعه شناسلار، مادّی مشکل‌لر و افسرده‌لیقدا بیلیرلر. خشونتین ریشه‌سینی، انسانین محیطده‌کی خطرلر و تهدیدلرین قاباغیندا مبارزه ائله‌ماغیندا آختارماق اولار کی اونون رفتارینا تأثیر قویور.
حددن آرتیق سیگنا چالیریق
خیاباندا گؤردوقلاریمیز بیزی بیر حدّه چاتدیریر کی پرت اولماغی، اؤزوموزده طبیعی بیر خصلت اولدوغونو دوشونوروق و نظریمیزه ائله گلیر کی غضبلندمه‌دن بیر ساعت ائودن ائشیگه اولا بیلمیروق.
بعضی عالملرین نظرینه گؤره، خشن اولماق انسانین حیوانی خصلتلریندن بیریدیر. هر کس غضبلنه بیلر آما انسانلیق و اسلام فرهنگینده اونو کنترل ائله‌ماغی اؤرگشیروق. غضبین کنترولو شخصین دنیایا گلدیغی و تربیت تاپدیغی محیطه باغلیدیر. اهل عیالی اینن خشن رفتار ائدن شخص، خشونتی اؤز اوشاقلارینا منتقل ائلر.
بیر ساده رفتارینان جامعه‌نین خشونت اندازه‌سینی بیلماق اولار. بیزیم جامعه‌ده اروپالی‌لارا نسبت چوخ-چوخ سیگنالدان استفاده اولونور. بیر حالداکی سیگنال فقط خطر زمانلارینی خبر وئرماقدان اؤترودور. سیگنالدان حددن آرتیق استفاده ائله‌ماغین سببی، غضبی نشان وئرماقدان اؤترودور. محکمه‌لرده‌کی ووروشما پرونده‌لری‌نین یوخاری ساییسی‌دا جامعه‌میزده‌کی خشونتین چوخلوغوندان خبر وئریر.
جنگ تجربه‌سی اولان جامعه‌لرده خشونت چوخ یوخاری حدده رواج تاپار و سونراکی نسل‌لره ده انتقال تاپار. بو مسأله ترمیم اولماسا جامعه‌یه جبران اولونماز و اوزن مدتلی صدمه‌لر وورا بیلر.
بیزیم جامعه‌میز تاریخ بویو هر طرفدن حمله‌یه معروض قالیب. ائله بو مسأله ده خشونتین گوجلنمه‌سینه سبب اولوب. اونون قاباغینی آلماق اوچون اوشاقلاریمیزا کیچیک یاشلاردان خشونتی آزالتماغی و غضبی کنترل ائله‌ماغی اؤرگتمه‌لی‌یوق. اونلارا اؤرگتمه‌لی‌یوق کی هم کلاسلاری اینن، هم وطنلری اینن، آیری انسانلارینان خشونتلی رفتار ائله‌مه‌سینلر چونکی اونلارین دا بیزیم قدر یاشاماق حقلری وار.