شرقی
آذربایجانین نماینده‌لر مجمعی‌نین رئیسی: اسلامی تبلیغات سازمانی‌نین تلاشلاری
تقدیره لایقدیر.
شرقی
آذربایجانین نماینده‌لر مجمعی‌نین رئیسی دئدی: استانین اسلامی تبلیغات سازمانی،
اعتبارین آزلیغی کیمی متعدد مشکل‌لره رغماً، فرهنگ و قرآن فرهنگی زمینه‌سینده تقدیره
لایق ایشلر گؤروب.
شرقی
آذربایجانین اسلامی تبلیغات اداره‌سی‌نین عمومی رابطه‌لری‌نین وئردیغی خبره
گؤره، محمد اسماعیل سعیدی پنجشنبه
گونو شرقی آذربایجانین قرآن مسابقه‌لری و قرآن تربیت مدرس دوره‌لری‌نین
ممتازلاریندان تجلیل مراسمینده دئدی: 35 ایل انقلابدان سونرا جماعتیمیز استکبارین
جور به جور فشارلاری و توطئله‌لرینه رغماً، فقط قرآنا اورک باغلاماغینان دوشمنلرین
شوم نقشه‌لری قاباغیندا دایانیب و ائله بو مسأله جمهوری اسلامی‌نین عظمتی و باش
اوجالیغینا سبب اولوب.
سعیدی بسیجی
تفکرونو قرآن ریشه آلمیش بیر فکر بیلیب آرتیردی: دوشمنین جماعتیمیزدن قورخوسو نه
اینکی اتم تکنولوژیسینه ال تاپماغیمیز اوچون بلکه قرآن مفهوملاریندان الهام آلدیغی
اعتقادلاردان قورخور.
او، دوشمنین فرهنگی
شبیهخون اینن مقابله یوللاری باره‌ده دئدی: جامعه‌نین ایندیکی مشکل‌لرینی آرادان
گؤتورماق اوچون قرآن تعلیملرینه اوز گتیرماق و اونون کناریندا داخلی
وارلیقلاریمیزدان استفاده ائله‌ماقدیر. و اگر فرهنگی شبیهخون مقابلینده دایانماق
ایستیروق گرک قرآن کریم آدیندا عظیم سرمایادان استفاده ائله‌یاق و اونون غنی
مفهوملارینا دّت ائله‌یاق بو دا مسئول‌لارین جدّی دقّتینی ایستیر و شرقی آذربایجان
اسلامی تبلیغات اداره‌سی‌نین بو زمینه‌ده مظلومانه و غریبانه فعالیّتی بو
اقداملاردان بیر نمونه‌دیر.
بو مراسمین
حاشیه‌سینده اسلامی تبلیغات اداره‌سی و شرقی آذربایجانین دارلقرآن الکریمین همّتی
اینن برگزار اولان تسنیم قرآن مسابقه‌لری‌نین ایکینجی دؤره‌سی و بیرینجی قرآن تربیت
مدرس دوره‌سی‌نین ممتازلاریندان تقدیر لوحو وئرماغینان تجلیل اولدو.