عاغیل، استعداد و ذکاوت والدینین اوشاقلاردا تقویت ائله‌ماغینی آرزیلادیقلاری خاصیّتلردندیلر. بوتون والدینلر اوشاقلاری‌نین هوشلو و استعدادلی اولماقلارینی ایستیرلر و ائله بونا گؤره اونلارا لاپ یاخجی مدرسه و لاپ یاخجی معلم تاپماغا چالیشیرلار. آما یادیزدا اولسون کی سیز والدین کیمی بو زمینه لاپ چوخ رول و قدرتیز وار کی اوشاغیزین اؤرگشماق قابلیّتینی کتاب اوخوماغینان تقویت ائلیه‌سیز و کتاب وخوماغی اونلارین زندگانلیقلاری‌نین آیریلماز قسمتینه چئویره‌سیز.

اوشاقلارا کتاب اوخوماق مزیّتی

هامی اوشاقلارا کتاب اوخوماغین اهمیّتلی اولدوغونو بیلیر. بوردا 2-6 یاشلار آراسی اوشاقلارا کتاب اوخوماغین مهم مزیّتلرینی سیزین اختیاریزدا قویوروق. حقیقتده انسان، عمر بویو اؤرگشدیقلاری‌نین یوزده یئتمیشینی ایکی یاشینا قدر اؤرگشمیش اولور.

- والدین اینن داها گوجلو رابطه: اوشاغیز بویودوغو کیمی، حرکتی، اویناماغی، قاچماغی و اطرافا کنجکاو اولماغی اؤرگشیر.کتاب اوخوماق سیزی قوجاغیزا آلدیغیز اوشاغیزینان دینج و آرام بیر گوشه‌ده اوتوروب بیری-بیریزین کناریندا اولماقدان لذّت آپارماق فرصتی وئریر. اوشاغا کتاب اوخوماغی مجبوری و صرفاً وظیفه اولدوغونا گؤره ائله‌مه‌یین. اوشاقلارا 2 یاشدان کتاب اوخوماق تربیتی بیر فعالیّتدیر کی اوشاغینان والدینین رابطه‌سینی گوجلندیرر.

داها یاخجی اؤرگشماق: اوشاقلارا کتاب اوخوماغین آیری مزیّتی‌ده اونلارین اؤرگشماق استعدادلارینی تقویت ائله‌ماقدیر. دبستاندان اوّل اوخوماغی باشلایان اوشاقلار، تعلیم زمینه‌لرینده داها فعال و داها یاخجی اولورلار.

دانیشیق مهارتلری: اوشاقلار دبستان یاشلارینا قدر دیل و دانیشیق مهارتلرینی اؤرگشرلر. والدینین کتاب اوخوماغینا قولاق آسماغینان اوشاقلاردا دیلی تشکیل وئرن اساس سسلر تقویت اولار. اوشاق کتاب صفحه‌لرینی های-کویونن چئویرنده سوادلانماقدان اوّلکی لاپ مهم فعالیّتینی تجربه ائلیر. اوشاقلارین کلمه و لغت دایره‌سی بؤیویور.

کتابین نئجه اوخونماسی: اوشاقلار دنیایه گلنده کتابین نئجه اوخونماسی  باره‌ده(ساغدان سولا و یا سولدان ساغا) علملری یوخدور و یا بیر صفحه‌ده‌کی یازیلارین تصویرلردن آیری اولدوقلارینی بیلمیرلر. بو واجب مهارتلری والدین اونلارا کتاب اوخویاندا اؤرگشرلر.

داها یاخجی رابطه قورماق مهارتلری: وقتیزی اوشاغیزا کتاب اوخوماغا قویدوغوزدا، اونلار اؤزلرینی داها یاخجی گؤرسده بیلیب آیریلاری اینان رابطه قورا بیلرلر. کتابداکی شخصیّتلرین آراسینداکی رابطه و هابئله ناغیلی اوشاقلارا اوخودوغوزدا اوشاغینان رابطه قوردوغوز زمانلار، اوشاق رابطه قورماغین ارزشلی مهارتلرینی اؤرگشیر.

دیله مسلّط اولماق: اوشاقلارا دبستاندان اوّل کتاب اوخوماق، مدرسه‌ده اؤرگشدیگی اصول اینان رابطه‌لیدیر.

داها آرتیق منطقی دوشونجه مهارتلری: آشاغی یاشلاردا اوشاغا کتاب اوخوماغی آیری مزیّتلریندن بیری، اونلارین مفهوم درکلری‌نین یوخاری گئتمه‌سی سبب و نتیجه‌نی تشخیص وئرماق و دوزگون قضاوت. اوشاق کتابین داخلینده‌کی حادثه‌لری بیر-بیرینه ربط وئرماغینان عین زماندا اونا اوخودوغوز ناغیلدان هیجانلی اولور.

- دقّت و انتظامین تقویتی: اوشاقلار ناغیلین تأثیرینده ناراحت اولا بیلرلر آما شبهه‌سیز اونلار ناغیلی آخیره‌جن قولاق آسماغی اؤرگشیرلر. ناغیل بویو اله گلن درک، اوشاقدا نظمین دال به داللیغی، آرتیق دقّت و یاخجی حافظه‌نی تقویت ائلر.

- اوخاماغا جذّابیّت یاراتماق: کیچیکلیقدا اوشاقلارا کتاب اوخوماق اونلارین بؤیوکلوغوندا اوخوماغا داها رغبتلی اولماقلارینا سبب اولار.

اوشاقلارا مناسب کتاب

دقت ائله‌ماق لازمدیر کی هر یاشا مناسب یاخجی کتابلار سئچماق لازمدیر. اوشاق بؤیودوقجن اونون کتابلاری‌دا یاشینا مناسی دگیشمه‌لیدیر.

- ورقلری چئویرماغی باشارمایان لاپ کیچیک اوشاقلارا، قاردون و یا پارچا کتابلار داها مناسبدیر. 5-6 یاشلی اوشاقلارا بؤیوک تصویرلی و رنگارنگ اولان کتابلار یاخجیدیر. چوخ تصویرلی و رنگی کتابلار بو یاشداکی اوشاقلارین رغبتینی آرتیرار. یاخجی کتابلار اوشاغینان بؤیویرلر. مثلاً اوشاغیزا بئش یاشیندا تصویرلی بیر کتاب آلساز او 6 یاشیندا اولاندا اونو سیزه اوخویا بیلر و سککیز یاشیندا چکیلیب بیر گوشه کتابی اوخویار. کتابی تکلیقدا اوخویا بیلن اوشاغا ائله بیر کتاب آلین کی تیتری، اونو مأیوس ائله‌مه‌دن چتینلیغا سالسین.

آلتی یاشدان کیچیک اوشاقلارا مناسب اولان کتابلار، اونلارین دقّتینی اساس مفهوملار، الفبا، حسّلر و دوستلوق رابطه‌سینه آرتیرار. هابئله تکرار، سس علمی و آیری دیل اؤرگشماق ابزارلاردان استفاده ائله‌ماق اونون اوخوماق مهارتین آرتیرار. بونا گؤره 5 یاشاقدر اوشاقلارین کتابلاریندا الفبا و عدد اولمالیدیر. بو یاشداکی اوشاقلارین کتابلاریندا تصویر چوخ و یازی آز اولمالیدیر. داها بؤیوک اوشاقلارا ائله کتابلار یاخجیدیر کی اونلارین درک مطلب گوجلرینی آرتیرسین و کلمه دایره‌لرینی وسعت وئرسین.

- 5 یاشدان آشاغی اوشاقلارین کتابلارینداکی تصویرل اونلارا تانیش اولوب اونون دقّتینی اؤزونه چکمه‌لیدیر. اونون کتابی اونون احساس، ال سورتمک، دقّت و تصویر باره‌ده دانیشماغا رغبتینی تحریک ائلیه. کتابلاردا اوخشار و یا فرقلی سایز و رنگلرده تصویرلر اولمالیدیر.

- تکلیقدا کتاب اوخویا بیلن اوشاقلار اوچون، اونلارا اوخوماق و یازماق مهارتینی اؤرگدن جذبه‌لی کتابلار سئچین. بو یاشداکی اوشاقلارا کتاب آلاندا ائله ناغیل‌لاری سئچین کی اؤرگشماق و باش قاتما آراسیندا متعادل اولسون. حقیقتده کتاب یوروجو اولمامالیدیر. یاخجی اولار بو کتابلاردا شعر ده اولسون.

- کتاب سئچنده اوشاغین اؤزو حاضر اولسا داها یاخجی اولار. اونون اؤز علاقه‌سینه‌ده کتاب باره‌ده سوروشون و اجازه وئرین سیزه کتاب سئچمکاقدا کؤمک ائله‌سین.