خانواده‌لرده‌کی
مدیریّت یاخجی اولسا آرامش و متانته سبب اولار و بونون تأثیراتی جامعه‌یه و او
بیری انسانلارا دا سرایت ائلر.
جامعه‌میزده
زندگانلیق مدیریّتینی اؤرگشماق یولو عمومیّتده آتا-آنا و اطرافداکی انسانلاردان
تقلید یولو اینن اولوردو. آما ایندیلیقدا اجتماعی واحدلرین و تلوزیونون تأثیری
داها یوخاری اولور. یعنی اوّل‌لر جامعه‌میزین اؤز فرهنگی سینه‌دن-سینه‌یه سونراکی
نسل‌لره انتقال تاپیردی آما ایندی بو اتصال و انتقال زنجیری چوخ ضعیفله‌ییب و
اوجور کی عمل ائله‌مه‌لیدیر، عمل ائلیه بیلمیر. ایندیکی شرایطده مدیریّتین
اورگشماغی‌نین دوزگون یولو، مناسب کتابلارین مطالعه‌سیدیر.
مدیریّتین
تعلیمی آتا-آنادان تقلید یولو اینن ادامه تاپسایدی جامعه گئت-گئده اؤزونو ترمیم
ائله‌ییب مدیریّت سبکلرینده‌کی اشکال‌لارینی تدریج اینن آرادان آپاریب، اونلاری
اصلاح ائلیه بیلردی. آما تلویزیون وسیله‌سی اینن آیری فرهنگلرین و مخصوصاً مشخص
هدفلره چاتماق اوچون تنظیم‌لنمیش مدیریّت سبکلرین جامعه‌یه القا اولماسی، ائله بیر
قارما-قاریشیقلیق یارادیب کی اونون اصلاحینا عمومی بسیج لازمدیر.
خانواده،
جامعه‌نین بیرینجی اجتماعی واحدی‌دیر و خانواده موفّق اولسا اونون تأثیرینده مدرسه،
مسجد، محله، شهر و حتّی مملکت کیمی داها بؤیوک اجتماعی واحدلر موفّق اولارلار.
خانواده‌لرده دوزگون مدیریّت طرزلری اجرا ائلیه بیلساق، بو مسأله جامعه‌نین
بوتونلوغونا سرایت ائلر.
زندگانلیغین
مادی، اجتماعی و عاطفی کیمی مختلف قسمتلری وار کی هر بیری‌نین دوزگون مدیریّتی
گؤزل و ساغلام بیر زندگانلیغا نتیجه اولار. جامعه‌میزده اولان مشکل‌لرین بیری استعدادلارین
و زمانین دوزگون مدیریّت اولماماسی‌دیر. مثلاً بیر ایش صاحبی اولماقدا انسانلارین
استعدادی و علاقه‌‌سی‌نین چوخ نقشی اولمور و بو اوزدن انسانلار سئومه‌دیقلاری
ایشلرده مشغول اولورلار و نتیجه‌ده چوخلو انرژی و وقت هدره گئدیر.