اوشاغین تربیتی اوچون هئچ واخت تئز دئییل ! بو سئویملی موجودلار چوخ عاغیللی‌دیلار و هر شئیی اوّلدن چوخ یاخجی اؤرگشیرلر.
بیر یاشلی اوشاق، غذاسینی بوشقابدان ائشیگه آتاندا، والدین اوننان نئجه رفتار ائله‌مه‌لی اولدوقلارینی بیلمیرلر. بیر طرفدن‌ده بئله گمان ائلیرلر کی اوشاغین یاشی آزدیر و اونو تربیت ائله‌ماق اولماز. آما بئله دئییل. اوشاغا خوش دیلی اینن اؤرگتماق اولمایاندا اولا بیلر یاخجی پیسی اونا اؤرگتماق لازم اولسون. والدین اکثراً تربیتی تنبیه اینن عوضی توتورلار. آما تربیتین بیناسی اؤرگتماغا دایانیر. بیر یاشلی اوشاغا محدودیّتلری اؤرگتماق لازمدیر. چوخ ساده یوللارینان اوشاغی دوزگون رفتارا طرف هدایت ائله‌ماق اولار.
اوشاغین الیندن ائله‌دیغی اشتباها گؤره حرصلندیغیز زمان اونا چیغیرمایین، اؤزوزو کنترل ائله‌یین. چیغیرماغیز باعث اولار اوشاق لج ائله‌سین. چیغیرماق یئرینه اونو فوراً و آراملیغینان سئودیغی ایشه تشویق ائدین. مثلاً گؤرسز اوشاق مبلین دسته‌لرینه دیرماشیر، چیغیرماق یئرینه اونو یئره قویون و اویناتمالیلاری اینن اوننان اوینایین یا اونا کتاب اوخویون. بو ایش، اوشاغین اشتباهلارینا مانع اولماقدان علاوه اونا بعضی ایشلرین گؤرمه‌مه‌لی اولدوغونو اؤرگدر.
اوشاغا ناهاردان و یا شامدان قاباق، قیویر-زیویر یئماغی قدغان ائله‌میش اولساز، آغلاییب عالمی بیر-بیرینه قاتسا دا اونا بو ایشه اجازه وئرمه‌مه‌لیسیز. بیر دفعه تسلیم اولساز، او بو ایشی اؤرگشر و همیشه چیغیرماق و آغلاماقدان اسلحه کیمی سیزین علیه-یزه استفاده ائلر.
اوشاغین تربیتی اوچون هئچ واخت اونا منطقسیز سؤز دئمه‌یین و همیشه دئدیغیزین اوستونده دایانین. بو مسأله‌ده آتا-آنا هماهنگ اولمالیدیلار. اولماز کی بیری اوشاغا طرف چیخسین و او بیری سؤزون یئریتماغا چالیشسین. بونون نتیجه‌سی مثبت اولماز.
باشاردیغیز قدر مثبت اولون. اوشاغا همیشه «یوخ»، «دَیمه»، «ائله‌مه» و بو کیمی سؤزلر دئسه‌ز بیر مدّت سونرا داها سیزی حسابا قویمیه‌جاق. «یوخ» سؤزونو هر یئرده خرجله‌مه‌یین اونو فقط ضروری یئرلرده ایشله‌دین. مثلاً اوشاق یاندیران و خطرلی بیر شئیین اوستونه گئدنده تئز و قاطعیّت اینن «یوخ» دئمه‌لیسیز. خطرسیز یئرلرده لزومو یوخدور «یوخ»دان استفاده ائلیه‌سیز. مثلاً بونون یئرینه کی دئیه‌سیز: «یوخ! ماشیندا باشماق چیخارتمازلار». یاخجی اولار دئیه‌سیز: «ائوه یئتیشه‌نه قدر اونلاری آیاغیندا ساخلا ! یئتیشندن سونرا آیاقلین یئرییه بیلرسن».
اوشاقلار سیزین دئدیقلاریزدان چوخ، عمللریزه باخیرلار. اؤرگشدیقلاری‌نین چوخو بؤیوکلردن تقلید ائله‌دیقلاریدیر. بونا گؤره سؤزونن اؤرگتماقدان علاوه، اونلارا بیر ایشی اؤرگتماقدان اؤترو او ایشی اونلارین گؤزونون قاباغیندا ائله‌یین. مثلاً اوشاغیز دوستلارینی وورسا، مهربانلیغی اونا عملاً اؤرگدین. دوستلاری‌نین بیرینی مهربالیغینان قوجاغیزا آلین. اوشاق‌دا اونلارا محبّت ائله‌ماغی اؤرگشر. یا مثلاً دیشلرینی یوماق آغیر گلسه، هیجانلی اولماق اوچون بو ایشی بیرلیقدا گؤرون.
یاخجی ایشلری تشویق ائدین. اوشاقلار بعضاً یاخجی رفتاری باشارمادیقلاری اوچون پیس رفتار ائلیرلر. بونا گؤره اونا یاخجی عملین نه اولدوغونو اؤرگتمه‌لیسیز. اوشاق یاخجی ایش گؤرنده اونون تشویق ائدین. بئله‌لیغینان او سیزین هانسی عمل‌لردن خوشوز گلدیغینی بیلر.