تشویق و تنبئه، قایدالارین رعایتی و نظمین قورولماسی اوچون ایکی تربیتی یولدور. اونلار یئرینده و اندازه‌سی قدر اولمالیدیلار.
تشویق نه‌دیر؟
تشویق، اینسانی شوقا علاقه‌یه گتیرن و استعدادلارینی چیچکلنماغا تحریک ائلیه‌ن و اونا داخیلی ریضایت وئرن وسیله‌دیر.تشویق آیریلاری طرفیندن فردین رفتارینی تقدیر ائله‌ماق اوچون مادی و یا معنوی ایقدام ساییلیر.
تنبئه نه‌دیر؟
اینسانین روحی و یا جیسمی اینجیمه‌سینه سبب اولوب بیر رفتارین انجامینا مانع اولان هر بیر زادا تنبیه دئییلر. تشویقده اولان کیمی تنبیه‌ده جیسمی و روحی اولا بیلر.
تشویق و تنبئهین اثری، روشوتینن پاداشین آراسیندا فرق یاراتدیغیمیز زمان، موناسیب اولار.پاداش وئرمک اوشاغین دَیَرینی تثبیت ائدیب اونون موناسیب رفتارینی و اخلاقینی دواملی ائلر.
آتا آنا طرفیندن اوشاغا جاییزه وئریلدیغی زمان، اوشاق آتا آنانین گؤزونده یاخجی اولان عملی تانییار و یا عکسینه آنا توکاندا اوشاغی‌نین الیندن جانا گلیب ایسته‌دیغینی اونا آلسا، بو ایشین تکراری اوشاغین سیرتیق اولماسینا سبب اولار. بئله جاییزه‌لر اوشاغا روشوت وئرماق کیمی بیر شئیدیر و اونون رفتاریندا منفی تأثیر قویار.
موتخصیصلرین چوخو بئله اینانیرلار کی منفی اثر اولان روشوتلری مثلاً «بو ایشی گؤرمه‌سن، بونو سنه وئرمه‌رم!» قیسا مودّت اوچون تأثیرلی اولسا دا اوزون مودّتده اثرینی الدن وئرر. آتا آنا یاخشی و لاییقلی رفتارلاری ترویج ائله‌مه‌لی و اونون موقابیلینده اوشاغا جاییزه وئرمه‌لیدیلر.
پاداش برنامه‌لری
1. موناسیب، یئرینده و واختیندان اولان پاداش
اوشاغین هر دفعه دوزگون عمل ائله‌دیغیندا پاداش لازیمدیر. لاکین بعضاً پاداشدان دواملی ایستیفاده موناسیب دئییل. چونکی اولا بیلر اوشاق پاداش آلماقدان یورولا و طلب اولونان عملی آز انجام وئره و یا ایمکانی وار والدینین هر رفتارین موقابیلینده پاداش وئرماغا فورصتلری اولمایا و یا اولا بیلر اوشاغین هر موناسیب رفتارینا پاداش وئرماغا ایمکان اولمایا.
2. اؤز اینتیظارلارینی موعیّنلشدیرماق
اوّلده اوشاقدان طلب ائله‌دیغیز ایشی سئچین. مثلاً یاتاندا باهانا آختارماسین، جمعده موناسیب رفتاری اولسون. سونرا وظیفه‌لرینی و گؤرولمه‌لی ایشلرینی اونا بیر-بیر موعیّن ائله‌یین. اوشاغین رفتاری گؤزله‌دیغیز کیمی اولسا اونا پاداش وئرین.
3. اوشاغینان مصلحتلشماق پاداش ساییلار
انگیزه یارادان پاداش باره‌ده اوشاغینان مصلحتلشیب، پاداشین ارزیشلرینی اونا سایاق.
4. تشویقده واختی رعایت ائله‌ماق
تشویق حؤکماً بللی اولان واخت و یا اوشاغین رفتاری دوزلندن سونرا اولمالیدیر. ایستدیغیز رفتار اونون بیر عادتینیه تبدیل اولانا قدر، تشویقی ایدامه وئرین.
5. تشویق اوچون هدف بللی ائله‌یین
تشویقدن هدف اوشاقلاری تربیتده دوز یولو باشلاماغا حاضیرلاماقدیر، بونا گؤره هر ایش اوچون اونو تشویق ائله‌ماق لازیم دئییل. اوشاغیز هر ایشی جاییزه و روشوت موقابیلینده انجام وئرماغا عادت ائله‌ییبسه، ایشی دایاندیریب، اونون تربیت یولونو دگیشدیرمه‌لیسیز.