دونیانین تحقیرین و آخیرتین دهشتلی عذابینی تؤحفه وئرن، اخلاق ناخوشلوقلارین لاپ خطرلیسی نیفاقدیر.بونا گؤره بو ناخوشلوغو تانییب ریشه‌سینی ایچریدن قوروتمالی‌ییق. نیفاق باعیث اولار مونافیق هر گروه و صینفینن دوشنده اونلار کیمی اولسون و حتّا اونلارین عقیده و ایناملاریندان دیفاع ائله‌سین. بو وضعیتین جامیعه‌یه بؤیوک خطری وار. پیغمبر اکرم (ص) بو باره‌ده بویوروب: من اومّتیم اوچون نه مؤمیندن قورخورام نه‌ده موشریکدن، چونکی مؤمین ایمانی اثرینده مؤمین قارداشینا ضرر یئتیرمز، موشریکی‌ده آللاه شیرکینه گؤره محو ائدر. من سیزین اوچون فقط سیز بیلیب عمل ائدیب اونا دایاندیقلاریزی دیلینن دانیشان، آییق مونافیقدن قورخورام. (1)
نیفاق اینسانین جانینا نفوذ ائله‌سه اونون دونیا و آخیرتینی یوخ ائلر. آللاه تعالا توبه سوره‌سی‌نین 28-جی آیه‌سینده مونافیقلره و کافیرلره جهنم اودونو وعده وئریب. نساء سوره‌سی‌نین 138-جی آیه‌سینده ده بویوروب: مونافیقلر بشارت وئر کی دردلی عذاب اونلاری گؤزلور. ایمام صادق‌ده (ع) بویوروب: موسلمانلارینان ایکی اوزلو ایکی دیللی اولانلار، قیامت گونو ایکی اودلی دیلینن محشر چؤلونه داخیل اولاجاقلار. (2)
نیفاق علامتلری
- نامازی ایشتیاقسیز و کسالتینن اوخویارلار. قورآن بویورور مونافیقین علامتی اودور کی نامازا دوراندا حالسیز و کسیل اولار. (نساء 142)
- موردّد و گؤیولسوزدولر. آللاه بویورور: گؤیولسوز و موردّدیلر. نه ایمان گتیریب مؤمینلره طرف گئدیرلر نه کافیرلره طرف. (نساء 143)
- ثیباتلاری یوخدور و موقعیتلرینی دَییشیرلر. قورآن بویورور: مؤمینلرینن اوز به اوز اولاندا «بیز سیزیننوق» دئییرلر آما شیطان و مونافیقلرینن اوزلشنده «سیزیننوق» دئییرلر و مؤمینلری مسخره ائدیرلر. (بقره 14)
- مونافیقلر ریا اهلی اولوب آللاه ذیکرینی آز دئیرلر. (نساء 142)
- یالتاقلیق، غیبت و پاخیللیق. ایمام باقر (ع) بویوروب: ایکی اوزلولر و ایکی دیللی‌لر پیس آدامدیلار. اینسان حضوروندا اونو تعریفلرلر و دالیسیجان غیبت ائدرلر. اونلارا کؤمک اولونسا پاخیللیق ائدرلر، فلاکته دوشنده اونلاری ترک ائدرلر. (3)
- موتمادی اولاراق پیس ایش گؤروب عوذر ایسترلر. ایمام حسین (ع) بویوروب: سونرا اوندان عوذر ایستیه‌جگین ایشدن کنار گز؛ چونکی مؤمین ایشتیباه‌دا ائله‌مز عوذر ده ایسته‌مز. مونافیق هر گون پیس ایش گؤرر و عوذر ایستر. (4)
- ناخوشدولار. قورآن بویورور: مونافیقلرین اورگینده ناخوشلوق وار. آللاه‌دا اونلارین مرضینه آرتیرار و آخیرتده یالان دانیشدیقلارینا گؤره اونلارا دهشتلی عذاب وئرر. (بقره 7)
- چوخ آند ایچرلر. مونافیقلر آللاه یولونو جماعت اوزونه باغلاماق اوچون اؤز آندلارینی قالخان ائلرلر. (منافقون 2)
- آشکاردا گوناه ائدرلر و قورخولاری اولماز. قورآن بویورور: مونافیقلر آللاهی اونودوبلار. مونافیقلر آشکار گوناه ائدن گوناهکارلاردیلار. (توبه 67)
هر کس پیس عملینه قدر موجازات اولار. آللاه عذابلاری‌نین درجه‌لری وار. عذاب بعضاً دردلی، بعضاً عظیم و بؤیوک، بعضاً تحقیر ائدیجی و بعضاً قالارگی اولار. مونافیقلری جامیعه‌ده داغیدیجی نقشلرینه گؤره عذابلاری دردلی اولاجاق. قورآن بویورور: مونافیقلر جهنمین لاپ آشاغی یئرینده‌دیلر. (نساء 145)
------------------------
1- سفینه البحار، جیلد 2 صفحه 606
2- خصال صدوق، جیلد بیر، صفحه 38
3- ارشاد القلوب، صفحه 178
4- تحت العقول،