اوشاقلارین هر کسدن آرتیق حیمایت و دیقّته احتیاجلاری وار و اونلاردان حیمایت کسیلمه‌یینجه موشکول قاباغا گلمز آما اوشاقلارین حقلی احتیاجلاری و ایستکلرینه دیقّتسیزلیق اولسا، اونلاری استر ایسته‌مز تبهکارلیق معرضینده قرار وئرر.
تبهکارلیقدا فیزیکی و بیولوژی عامیل‌لرین اثری اولسا دا موحیطین تأثیری داها چوخدور. اوشاق اؤزونو آیریلاریندان فرقلی احساس ائدنده و گؤرنده کی اطرافداکیلار و جامیعه اونو گؤرمه‌دیم حسابلیر و اونا ارزیش وئرمیر، اؤزونو مجبور گؤره‌جاق جامیعه‌نین قاباغیندا جیبهه توتسون و اؤز حقّینی زورلا دا اولسا آلسین و یا بو ظولمه گؤره جامیعه‌نی تنبیه ائله‌سین.
جامیعه‌ده اولان ایجتیماعی، سیاسی، ایقتیصادی، فرهنگی، علمی و صنعتی دگیشیک‌لیکلر نسللر آراسیندا فاصیله آچیر و باعیث اولور اوشاقلار بئله حیس ائده‌لر کی والدین اونلارین ایستکلرینه و نظرلرینه اهمیّت وئرمیرلر. بئله‌لیکله اونلارین قاباغیندا جیبهه قورورلار و بو شراییطه دؤزمگی، ایمکانسیز گؤرنده ائودن قاچماغا دا ایقدام ائدیرلر. ائشیکده ده تبهکارلیق زمینه‌لری حاضیر و آماده‌دیر.
اوشاغین ایستکلرینی یئرینه گتیرمک، اونون یاشینا موناسیب اولمایان شراییطده ده تبهکارلیق احتیمالی چوخالیر. حددن آرتیق آزادلیق وئرمک و حقسیز ایستکلرینی‌ده یئرینه گتیرمک و اونون عکسینه حقلی ایستکلرینه دیقّت یئتیرمه‌مک و اونو تحقیر ائله‌ماق و یاشیتلاریندان اوزاق ساخلاماق اوشاغی تبهکارلیغا طرف ایته‌لر.
زیندگانلیق ایمکانلاری‌نین اولماماسی، والدینین ایقتصادی لحاظدان ضعیف اولماسی، اونلارین مسئولیتسیزلیگی ده، اوشاغین تربیتینده موهیم تأثیری وار و تبهکارلیق شراییطینی حاضیرلایا بیلر.
جامیعه‌ده دوزگون و سالیم اینسانلارین نمونه و اولگو کیمی مطرح اولماماسی و اونلارین یئرینه غیری موناسیب شخصلرین اولگو عنوانیندا تقدیم اولونماسی اوشاقلاری قورخولو گله‌جگه آپارا بیلر.