اینسانلارین ایستعدادلارین چیچکلندیرماق اوچون تشویق لاپ یاخجی یول ساییلیر و جماعتین ایصلاحینا چالیشان هر کس, گرک اؤرگشه کی اونلاری اؤز گوجلرین تانیماغا و ایچلرینده آللاه طرفیندن ودیعه قویولان بؤیوک خزانه‌نی کشف ائله‌مگه, تشویق ائده.
اینسانلارین یاخشیلیقلارین دیله گتیرماق, اونلارین ایصلاحی اوچون لاپ گؤزل یوللاردان ساییلیر. آما موتأسیفانه جماعتین چوخو اونون ترسه‌سین ائلیرلر، یعنی همیشه خطاکار اینسانین منفی طرفلرین و ایشلرین اونون یادینا سالیب اونو دانلیرلار و نظرلرینه بئله گلیر کی بو ایش باعیث اولار او, ایشتیباهلارین جوبران ائله‌سین و منفی طرفلری اؤزوندن اوزاقلاشدیرسین.
شکسیز بو ایش یا دوستلارینان و یا جماعتینن ایشتیباهدیر. دوز یول بودور کی پیسلیقلاری آرادان آپارماق اوچون یاخشیلیقلاری و گؤزللیقلاری سایاق و جماعتی اونلارا طرف تشویق ائدک.مثلاً قارانلیغی آرادان آپارماق اوچون اونا یامان دئمکله و اونو دانلاماقلا بیر ایش گؤرمک اولماز، بلکه بیر شع یاندیرماق اونلاردان داها چوخ فایدالی اولار و بئله‌لیقلا قارانلیق آرادان گئدر. جامیعه موریدینده و جماعتین روحی و معنوی ایشلرینده‌ده وظیفه‌میز وار اونلارین ایچینده‌کی قارانلیقلاری لعنتله‌ماق یئرینه, آرزو شمعلرینی اورکلرینده یاندیراق. بو ایش, اونلاری ایشقیلیغا طرف آپارماقدان علاوه باعیث اولار اؤزوموزه‌ده آللاه یانیندا اجر اولسون.
حضرت علی (ع) بویورور: هر کس بیر موسلمانی تعریفله‌یه اونون اوچون اجر وئریله‌جاق». تعریفله‌ماقدان منظور اونون یاخشیلیقلارین سایماق و اونلارا طرف تشویق ائله‌ماقدیر. بو ایشین، تعریفله‌ین اوچون ایکی نتیجه‌سی وار: آللاه طرفیندن وئریلن اجر و جماعت طرفیندن قاییدان منفعت. جامیعه بیر آغاج کیمیدیر کی بیر شاخه‌سی آیری شاخه‌لره کؤمک ائله‌سه حقیقتده آغاجا و اؤزونه کؤمک ائدیب.
گرک اینسانلارین یادینا سالاق کی سنین ایچینده بؤیوک بیر شخصیت گیزلنیب و سن گرک اونو ائشیگه چیخاردیب پدیدار ائده‌سن و اونون اؤلوب ایتمه‌سینه ایجازه وئرمیه‌سن. و بئله‌لیغینان تشویق و تعریفله اینسان قاباغا گئدر و ایچینده‌کی انرژیلر آزاد اولار. گرک اینسانلارین یادینا سالاق کی اونلارین ایچینده خلیفةالله‌لیق پوتانسییئلی وار و بیر اینسان کیمی اونو پدیدار ائله‌ماق اونلارین وظیفه‌سیدیر.
خطاکار اینساندان اینتیقاد ائله‌ماق باعیث اولار او اولکوتولسون و اعتیناسیز اولسون. خطاکار اینسانی تشویق ائله‌ماغین لاپ یاخجی یولو بودور کی خطانین و ایشتیباه عملین اؤزوندن اینتیقاد ائده‌سن آما خطاکارین شخصیّتینه توخونمایاسان.