پئشه‌لرین محو اولماسی تدریجی و یاواش یاواش اولار، نئجه کی یارانمالاری‌دا تدریجی اولار.مثلاً بیر گون بیردن یادیزا دوشور کی چوخداندی یون چالماق گؤرمه‌میسیز.
بیر گون ائشیدیرسیز کی قیشقیرماق آدیندا بیر پئشه یارانیب کی او پئشه‌ده ایشله‌ینلر قیشقیریب توکانلارا موشتری ییغیرلار.
اینسانلار نه واختدان پئشه صاحیبی اولدولار؟ اونلار همن زماندان کی کؤهوللرده اودون اطرافینا ییغشیردیلار و اونون آلوولارینا باخیردیلار پئشه صاحیبی‌ایدلر. اونلار شیکارچیدیلر و زیندگانلیقلارین بو یولونان کئچیندیریردیلر.
ایللر کئچندن سونرا اونلار اکینچی و داوارچی اولدولار و یاواش یاواش آلیش-وئریشه‌ده باخدیلار.
اینسانلار بیر مودّت سونرا جینس و کالا موقابیلینده پول آلدیلار و بئله‌لیغینان اینسانلارین احتیاجلاری چوخالدیقجا پئشه‌لرین سایی چوخالدی.
پئشه‌لرین یارانما سببی اینسانلارین بیر زمان مقطعینده، خاص بیر شئیه احیتاجلاری اولماسیدیر.مثلاً بیر زمان مودیریّت آدیندا بیر پئشه یوخیدی و احتیاج اولدوغوندا بو پئشه یاراندی.
پئشه‌لر ده اینسانلار کیمی یارانیر و اؤلور. هر لحظه کی بیر پئشه آرادان گئدیر بیر آیریسی اونون یئرین توتور. مثلاً ایندیکی جماعتی، تیلویزیون کیمی مشغول ائدن او قدر مشغولیّت وار کی داها دوروب زنجیر قیران پهلوانلارا باخماغا هئچ کسین حوصله‌سی اولماز.
زمان بویو اینسانلار بعضی خیدمتلر و جینسلردن بی نیاز اولور و بو باعیث اولور کی او جینس و خیدمت سایه‌سینده پئشه صاحیبی اولان آداملار ایشسیز قالسینلار. و دوزگون بیر مودیریّتی اولان جامیعه‌نین مودورلری بو صینفین فیکرینده اولوب اونلارین آشاغی ایقتیصادی طبقه‌یه دوشمکلری‌نین قاباغین آلارلار.