شرقی آذربایجانین اوستانداری اومیدوارلیق ایبراز ائله‌دی کی بو اوستانین ظرفیتلرین اؤلکه‌ خاریجینده تانیتدیرماقلا, ایرانین خاریجی رابیطه‌لری و مخصوصاً ایقتیصادی حوزه‌ده قونشو اؤلکه‌لرینن چوخالا.

فارسین تبریزدن وئردیغی خبره گؤره, احمد علیرضابیگی شرقی آذربایجان و آذربایجان جومهوریسی آراسیندا رابیطه‌لرین چوخاتماق ایجلاسیندا -کی جومهوری ایسلامی‌نین بو اؤلکه‌ده‌کی تازا سفیری‌نین حضوری‌اینن بو اؤلکه‌ده برگوزار اولونوردو- تبریز و باکی‌نین قدیم رابیطه‌لرینه ایشاره ائله‌ماغینان دئدی: موختلیف زمینه‌لرده بو رابیطه‌لری و همکارلیقلاری گوجلندیرماق, اوستان مودیریتی‌نین اولویّتینده‌دیر و بو زمینه‌ده آذربایجانلی طرفینن یاخجی موذاکیره‌لر و ییغینجاقلار اولوب.

او بونا ایشاره ائله‌ماغینان کی جومهوری ایسلامی و آذربایجانین همکارلیقلاری‌نین چوخالماسی هر ایکی طرفین منفعتینه‌دیر, دئدی: شرقی آذربایجان اؤلکه‌نین شیمال غرب صنعتی و علمی قوطبی کیمی ائلیه بیلر بو زمینه‌ده تعیین ائدن همکارلیقلار ائله‌سین.

علیرضابیگی ایرانین قاباقکی سفیری محمدباقر بهرامی‌نین زحمتلریندن قدردانلیق ائله‌ماغینان, موختلیف زمینه‌لرده آذربایجان جومهوریسی‌اینن رابیطه‌لرین گئنیشلندیرماقدا شرقی آذربایجانین کامیل حاضیرلیغینی اعلام ائله‌دی و آرتیردی: شرقی آذربایجانین ایجرایی دستگاهلاری و خصوصی بخشی حاضیردی کی ایرانین باکیداکی سیفارتی‌اینن ایکی اؤلکه‌نین ایکی طرفلی رابیطه‌لرین گوجلنمه‌سی اوچون همکارلیق ائله‌سین.

بو ایجلاسدا کی اوستاندارین برنامه‌ریزلیق موعاوینی و خاریجی ایشلری ویزارتی‌نین اوستانداکی نوماینده‌سی‌نین حضوری واریدی, ایقتیصادی و دارایی ایشلری, یول و شهر سالما, منطقه سویو, صنعت, معدن و تیجارت, حمل و نقل و ترمیناللار, گومروک ناظیرلری, تبریز و علوم پزشکی دانیشگاهلاری‌نین رئیسلری و مودیرلری, و هابئله جلفا, خداآفرین فرماندارلاری و آراز آزاد تیجاری صنعتی منطقه‌نین موعاوینی آذربایجان جومهوریسی‌اینن رابیطه‌لرین چوخالماسی باره‌ده نظرلرین دئدیلر.