تازا بیر تحقیق گؤرسدیر کی خانیملار ائولنماقدان قاباق, آغالاری اینن ائولنماقدا تردید ائله‌سه‌لر, ایمکانی وار گله‌جاقدا اولارینان ایختیلافلاری چیخا.

لایو ساینسین دئدیگینه گؤره بو تحقیق ائدن آمریکالی موحقیقلر دئییرلر کی جماعت بئله اینانیر کی اولا بیلر کی هر بیر کس ائولنماقدان قاباق تردید ائله‌سین و بو نیگرانچیلیغا سبب اولا بیلمز.

آما بو موحقیقلرین تحقیقی گؤرسدیر کی بو جور تردیدلر راییج‌ده اولسا عاقیبتلری حتماً خوش اولمور. بو تحقیقده بللی اولدو کی ائولنماقدان قاباق تردیدلری اولان خانیملارین بوشانما احتیمالی آیریلارینا نیسبت 2.5 برابر ایدی.

هابئله ائولنماقدان قاباق تردیدلری اولان ار-آروادلار کی 4 ایل سونرا هله‌ده موشترک یاشاییشلارینا ایدامه وئریردیلر, زیندگانلیقدان ریضایتلری تردیدسیز جوتلوقلاردان چوخ-چوخ آز ایدی.

بو موحقیقلر لوس آنجلسده 222 جوتلوغو ائولنماغین اوّل آیلاریندا و سونرا آلتی آیدان دؤرد ایله‌جن تحقیق ائله‌دیلر. بو موحقیقلر دئیرلر هر چند ائولنماقدان قاباقکی تردید حتماً آیریلماغا محکوم ائله‌مز آما اونلارین دئدیگینه گؤره زوجلار گرک ائولنماقدان قاباقکی تردیدلری حل ائده‌لر.